Partisipashon di Minister GMN na High Level Forum na Bahamas

Partisipashon di Minister GMN na High Level Forum na Bahamas

 

Willemstad – Dia 20 i 21 òktober último Minister di Salubridat, Medio Ambiente i Naturalesa, drs. Dorothy Pietersz- Janga a partisá na un High Level Forum (HLF-6 Waste) durante di un konferensia di Water and Wastewater na Nassau, Bahamas.

Señor Aubrey Janga, konsehero di Minister i señora Ciaretta Profas ku ta kolaboradó enkargá ku maneho di medio ambiente i naturalesa tambe a partisipá na HLF. E organisashon Caribbean Water and Wastewater Assosiation ta stimulá koperashon regional riba tereno di maneho pa awa, awa residual i sushi.

 

E tema di e HFL ta: ‘’From Global Resolution to Regional Solutions: ‘’Let’s End Plastic Pollution!’. E tema ta tokante prohibishon di sierto produktonan di plèstik (di un solo uso). Ku esaki, ta atendé un parti di e problema di sushi kune i na mesun momentu stimulá e transishon na un ekonomia sirkular. Diferente otro país den Latino Amerika i Karibe a partisipá i a presentá kon nan eksperensia ta na e momento ku a implementá e prohibishon di plèstik.

 

Durante e HFL, Minister Pietersz- Janga a hasi uzo di oportunidat pa reuní ku representantenan regional i tambe organisashonnan no- gubernamental (“NGO’s”) ku e meta pa mas kolaborashon regional i internashonal. Asina a reuní por ehèmpel ku representantenan di Aruba, Sint Eustatius i Sint Maarten pa explorá un “center of exellence” den Reino Hulandes pa asina stimulá kopershon regional riba tereno di maneho di sushi.

 

Esaki ta un punto partikularmente importante pa Kòrsou pa por prepará e implementashon di maneho nobo kon pa atendé ku sierto plèstik. Ministerio di GMN ta aspirá un Kòrsou mas limpi i ménos sushi kantu di kaminda i den naturalesa pa un kalidat di biba mas salú.

Ku e maneho nobo aki den un futuro serkano Ministerio GMN ta spera di redusí e kantidat di plèstik desechabel na Kòrsou. E kantidat grandi di plèstik desechabel den laman i riba tera ta oumentando tur aña ainda. Esaki ta dañino pa nos medio ambiente. Un Kòrsou liber di plèstik ta saludabel pa su habitantenan, krusial pa medio ambiente, atraktivo pa turismo i ku esei bon pa ekonomia sirkular.

1 Riba potrèt Minister Pietersz- Janga na e High Level Forum na Nassau, Bahamas.
2 Riba potrèt Minister Pietersz- Janga huntu ku representantennan di otro pais
durante klousura di e konferensia.

3 Riba potrèt; Minister Pietersz- Janga i señor Marlon Daniels (presidente di
CWWA).

Share this page to Telegram

This site uses Akismet to reduce spam. Learn how your comment data is processed.

%d bloggers like this: