B’JAY i su ‘live band’ den pre-show pa Burna Boy

 

 

B’JAY i su ‘live band’ den pre-show pa Burna Boy

 

WILLEMSTAD: Tur hende ta den ‘gara’ total di Burna Boy, sinembargo Kòrsou mes lo keda representá dor di un artista hoben, potente i ku tur ingrediente pa bira un gran eksponente di músika urban. B’JAY ya ta bria riba Youtube ku 800k views i ta hopi popular pa entre otro Balaclava. E’la prepará un tremendo show ku su ‘live band’ i lo bin pa saka kara di Kòrsou. Di parti e tim di B’JAY por a komprondé ku ensayonan a kana tremendo i ku e hoben artista mes ta sumamente entusiasmá ku e oportunidat úniko aki ku sigur lo avansá su karera den e género. Dos siman pasá SUN SPLASH a anunsiá FMG (Family Money Gang) ku tambe lo ta den e pre-show line-up. FMG lo ta yegando for di Hulanda djaweps dia 27 di òktober atardi.  FMG ta popular pa entre otro e kansion ‘Boot’ ku tin riba 2.7 mion views riba YouTube i ta kosechando un éksito rotundo den e ambiente dancehall, R&B i Hip Hop na Hulanda.

 

E pre-show ta mes ‘kayente’ ku e konsierto: FMG, B’JAY, MC Chris Strick, MC Don T, Dj Krokzz, Dj Fab i Dj Lambo. Ta pidi pa tur hende kuminsá forma liña di entrada alrededor di 6’or. Portanan lo habri 7’or di anochi; tene kuenta ku mester pasa dor di kontrol di seguridat na porta ku tambe ta rekerí tempu. Unabes paden, lo tin músika i ta kuminsá mesora ku e line-up, un tras di otro pa na final di e anochi Burna Boy presentá ku su live band!

 

Ta kòrda tur hoben ku mester ta kompañá pa un adulto. Ta pidi pa tur hoben kana ku nan ID durante di e konsierto. Mester bisa ku praktikamente tur sekshon VIP ta ‘sold out’- ku eksepshon di algun karchi mas p’e área ‘Location’- e área di mas grandi- ku ta e ‘standing’ dilanti di stage. Buska bo karchi pa sekshon general na tur punto di benta i riba caribbeanticketshop.com. SUN SPLASH, Key Caribe i Unique Productions ta invitábo p’e  konsierto di BURNA BOY ku su banda aki na Kòrsou!

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: