MINISTER COOPER TA PARTISIPÁ NA ‘GLOBAL FORUM ON CYBEREXPERTISE’

MINISTERIO KONSERNÍ TRÁFIKO, TRANSPORTE I PLANIFIKASHON URBANO

 

MINISTER COOPER TA PARTISIPÁ NA ‘GLOBAL FORUM ON CYBEREXPERTISE’

PUBLIKÁ RIBA 14 NOVÈMBER 2022

Willemstad – Minister Charles Cooper a partisipá dia 14 di novèmber na e asina yamá ‘Global Forum on CyberExpertise’ (GFCE), relashoná ku seguridat sibernétiko na Santo Domingo.

Meta di GFCE e aña aki tabata pa diskutí e ròl di GFCE den Latino Amerika i Karibe, i kon pa kordiná esfuersonan pa desaroyá kapasidat humano den e regionnan (‘capacity building’).

Durante di e reunion, a presentá na un públiko amplio, esfuersonan ku paisnan den Latino Amerika i Karibe ta hasiendo den kuadro di seguridat i maneho sibernétiko.

E enkuentro aki a sirbi komo un oportunidat pa introdusí e progreso di e asina yamá GFCE LAC Hub, diskutí ku partisipantenan e prioridatnan pa futuro, i introdusí GFCE i su posibilidatnan pa envolvimentu di figuranan klave den nos esfuersonan pa maneho i seguridat sibernétiko.

E enkuentro di awe tabata un enkuentro habri, informal i interaktivo kaminda e presentadónan kada unu a mustra kua ta e benefisio si Karibe uní komo region pa por haña oportunidatnan i fondonan nesesario pa atendé ku maneho sibernétiko di kada pais.

Na final, a mustra pa 3 pais kon, den un tempu rápido, nan a dal pasonan firme riba e tereno di maneho i seguridat sibernétiko. Esaki tabata atraves di relashonnan bilateral i multilateral. Chile, Mexico i Ecuador a mustra nan historia di éksito.

Tambe tabatin presentashonnan tokante kon pa establesé efektivamente, un asina yamá ‘Computer Incident Response Team’ (CSIRT), un ‘Community Emergency Response Team’ (CERT), i kon e CSIRT i CERT mester traha huntu.

Den nos region, mayoria CSIRT ta posishoná den e Ministerio di Teknologia. Dos kos a resaltá hopi, esta 1) introdusí teknologia sin tene kuenta ku nos siudadanonan lo no ta éksitoso, i 2) Kòrsou tambe por bira miembro di GFCE sin gastu adishonal. Na su regreso, Minister Cooper lo bai atendé esaki ku Konseho di Minister.

Na final, tabatin un enkuentro ameno ku tur partisipante pa sigu sosialisá i interkambiá di idea.

Share this page to Telegram

This site uses Akismet to reduce spam. Learn how your comment data is processed.

%d bloggers like this: