Lipo Elhage RBI 2022 a ranka sali ku bunita homenahe

 

WILLEMSTAD – Djabièrnè atardi a duna inisio na e kampionato di RBI 2022 ku un bunita homenahe na Philip ’Lipo’ Elhage selebrando su bida i e legado. Lipo Elhage a bai laga tras un fundeshi sólido sigur pa beisbòl pero pa mas spesífiko den e kaso aki pa RBI Curacao ku awor lo keda yama ‘Lipo Elhage RBI Curaçao’. Apertura a tuma lugá den presensia di famianan di Lipo Elhage i tambe spònser prinsipal MCB huntu ku direktiva di Curacao Baseball Development Foundation i Fundashon pa Nan ku ta enkargá ku ku e kampionato di RBI 2022. Representantenan di kada ekipo tambe tabata presente i komo símbolo di e kampionato nobo a risibí tambe material pa nan ekipo. Despues di e parti ofisial i lansamentu di e promé bala, tabata ‘play ball’.  E wega di apertura a bai entre Sta. Rosa Indians i Sta. Maria/Firebirds Padres. Den un wega basta pèrta Indians a sa di gana nan promé wega di temporada ku skor di 10-8. Picher ganador tabata Rajengelo Paulina i picher pèrdèdó tabata Aiden van Kimmenaede pa Padres. E mihó bateadó pa Sta. Rosa tabata Qyshawn Legito di 3-2. Pa Padres, Nwigher Francisca a bai di 2-1. Djasabra ta solamente un wega por a hunga debí na áwaseru ku a kai i djadumingu lamentablemente mester a kanselá tur wega. Den e úniko wega ku a tuma lugá djasabra den un bunita duelo di picheo Groot Kwartier Astros a blankea Marchena Braves ku skor di 3-0. Picher ganador tabata Johaimry Balentina i Quishanic Martis a resultá e picher pèrdèdó pa Braves. Den e parti ofensivo, Deshandro Tromp a bai di 3-2 pa Braves i Daysheron Luciano i Welton Lourens di 2-1 pa Astros. Direktiva di Lipo Elhage RBI a traha un skema nobo mesora pa durante e siman aki mes logra reprogramá mayoria di e weganan ku a keda kanselá den fin di siman. Dialuna 28 nov. 17:30 Cardinals-Braves

Diamars 29 nov. 17:30

Padres-Dodgers

Diarason 30 nov.

17:30

Astros-Indians

Diaweps 01 dec.

17:30

Dodgers-Cardinals

Tur wega ta tuma lugá na Tio Daou Ballpark. Kòrda ku weganan di lipo Elhage RBI Curaçao 2022 por keda sigui di forma digital via iScore i tambe semper por bishita e website http://www.rbicuracao.com, unda por haña tur informashon i resultadonan. RBI Curaçao tin su propio twitter account tambe bou di @CuracaoRbi i ya manera sa kaba tin e página riba Facebook. E kampionato ta posibel danki na MCB, CBDF, KNBSB, MLB i Fundashon pa Nan.