Minister Shalten Hato INSTALASHON DI SR. RAYMOND ELLIS KOMO KORPSCHEF DI KPC

Willemstad – Djabièrnè último, 2 di dezèmber 2022 a tuma lugá instalashon ofishal di sr. Raymond Ellis komo korpschef di Korps Politie Curaçao. Sr. Ellis tin un trayektoria remarkabel den kuerpo polisial kual a start na aña 1981. Den e último 41 añanan ela okupá diferente funshon den KPC manera entre otro inspektor di polis, Chef ‘’wijkteam’’ Punda i Hoofd Recherche en Informatie Dienst. For di 2018 e ta fungiendo komo Plaatsvervangend Korpschef kual den 2022 a ser konkretisá ku nombramentu di Minister mr. Shalten Hato komo Hefe di Kuerpo Polisial Kòrsou.

Riba e anochi festivo aki tambe a otorgá sr. Elbert Sambo su ‘’landsbesluit’’ pa asina ofishalisá su funshon nobo di Hoofd Bedrijfsvoering den Kuerpo Polisial Kòrsou. Adishonalmente a despedí di sr. Prisco Francisca kende ta Direktor di Interpol Kòrsou. Sr. Francisca despues di un karera di mas di 40 aña den e kadena hudisial ta bai ku un pènshun bon meresí despues di dediká kurpa i alma na kombatimentu di krímen riba nos pais. Minister Hato ta ekstendé un kaluroso pabien na tur e tres kabayeronan aki i ta spera nan por sirbi komo ehèmpel pa otronan.