MINISTER COOPER TA TRATA MANEHO DI TERENO I BIENES PÚBLIKO

Willemstad – Riba djaweps 8 di desèmber, Minister Charles Cooper huntu ku funshonarionan di su ministerio, entre otro su Sekretario General i Direktor di Domeinebeheer, a reuní ku ekspertonan riba e área di maneho di tereno i bienes. E ekspertonan aki ta yudando Kórsou den ehekushon di e proyekto di landspakket E-7, esta tokante maneho di Kòrsou su terenonan i bienes (‘Grond en Vastgoed’). E enkuentro a tuma lugá na despacho di Minister Cooper na Arrarat.

Durante di e enkuentro aki, Minister Cooper a risibí un splikashon amplio di kua ta tur e desaroyonan ku a tuma lugá i kon ta sigui. E ekspertonan lo interkambiá ku sektornan gubernamental i no-gubernamental pa yega na un mihó desaroyo di áreanan manera entre otro Rif i Colon.