Klientenan ku debe pendiente pa pago tuma nota: AQUALECTRA A TRASPASÁ KOBRANSA DI IMPUESTO DI SUSHI PERIODO 2018 – 2021 PA ONTVANGER

AQUALECTRA A TRASPASÁ KOBRANSA DI IMPUESTO DI SUSHI PERIODO 2018 – 2021 PA ONTVANGER

Willemstad – Desde 15 di desèmber último tur kliente ku ainda tin debe di Impuesto di Sushi pa e periodo entre 1 di yanüari 2018 pa 31 di desèmber 2021 mester akudí na Ontvanger pa hasi e pago di esaki. Pues Aqualectra mes ya no ta atendé mas ku e pregunta òf keho di Impuesto di Sushi pa e periodo konserní. Tur kliente ku ainda mester paga esaki lo risibí un karta próksimamente di Ontvanger ku tur instrukshon nesesario pa kanselá e debe. Klientenan ku no ta di akuerdo ku e montante registrá komo debe di Impuesto di Sushi pa e periodo entre 1 di yanüari 2018 pa 31 di desèmber 2021 por entregá un keho òf hasi petishon pa eksonerashon na Ontvanger después di a risibi un karta di Ontvanger. Tene na kuenta ku Impuesto di Sushi pa aña 2022 ta independiente for di e proseso aki, esta ku e montante ku mester paga pa aña 2022 lo sigui sali riba e faktura na fin di luna i ku por paga esaki manera kustumber na Aqualectra.

Resientemente Aqualectra a traspasá parti di e kobransa di Impuesto di Sushi pa Ontvanger. Klientenan ku debe pa e periodo menshoná a risibí un karta di Aqualectra ku indikashon di e montante registrá komo debe i e petishon pa paga esaki na Aqualectra denter di 3 siman. A stipulá tambe ku despues di e 3 simannan aki Aqualectra ta traspasá e debe pa Ontvanger por sigui atendé ku kobransa.