Despues di a mata Marianella e hòmber a pasa nochi den e kas

E hòmber di desendensia Kurasoleño ku ta sospechá di a tira e hende muhé di Kòrsou di 43 aña den un kas na Rotterdam-Vreewijk, lo a pasa nochi den e kas despues di e tiroteo. E mainta siguiente, riba di dos dia di Pasku, el a sali bai i a laga dos yu atras serka nan mama morto. Hustisia ta dedusí ku ta trata di violensia entre pareha. 

Esaki ta resultá di e investigashon te ku awor, segun Ministerio Publiko. E sospechoso di 44 aña ta keda detené por lo pronto. Un otro sospechoso ku a keda detené, un hòmber di 52 aña, a keda lagá den libertat. E ta keda sospechá si ainda di tabata metí. Probablemente e drama a tuma lugá den e marduga di Pasku pa di dos dia di Pasku. Te e anochi di e di dos dia di Pasku, un di e muchanan a buska yudansa pa medio di drenta den kontakto ku famia. Segun Ministerio Publiko e muchanan mester tabata testigu di un drama horroroso.

Dos mucha a kana sali ku agentenan polisial despues ku nan mama a keda asesiná durante dianan di Pasku huntu ku nan den kas.

Ta sospechá ku e sospechoso prinsipal a bai ku e arma di kandela na kas di e sospechoso ku a keda lagà den libertat despues di e tiroteo. Por lo pronto Ministerio Publiko ta konkluí ku ta trata di violensia entre pareha.