Manrique Capriles ta hasi traspaso di maneho diario
Manrique Capriles ta hasi traspaso di maneho diario
WILLEMSTAD – Djabièrnè atardi 4 di Ougùstùs a tuma lugá na Manrique Capriles na Scharloweg, un evento durante kua, dilanti di un grupo selekto di invitado, e CEO saliente, sr. Willem da Costa Gomez a pasa maneho di e empresa pa sr. Michael de Koning komo e CEO nobo. E akto a ser realisá di un forma simbóliko den kua sr. da Costa Gomez a pasa un antorcha sendé pa sr. de Koning. Ku e evento a selebrá alabes e echo ku Manrique Capriles ta den su di 100 aniversario i na luna di òktober awor lo kumpli 101 aña di eksistensia.
Manrique Capriles a ser fundá na 1922 i ta entre e empresanan di mas aña na Kòrsou. E empresa ta konosí komo agente i empresa di benta por mayor, di produktonan farmaseutiko i medisinal i tambe artíkulonan kosmétiko di markanan rekonosí . E empresa tin operashon alabes na Aruba.
Sr. Da Costa Gomez, durante di su diskurso a bisa ku Manrique Capriles ta parti di e ret di kuido di salú na Kòrsou i Aruba. “Meta di e ret aki ta pa mehorá kalidat di bida di e pashènt, popularmente yamá awendia ‘e kliente’. “E ret ta konsistí di vários partisipante manera entre otro Gobièrnu, SVB, Inspekshon di Salubridat i Medisina, hòspitalnan, dòkternan, botikanan etc.”, e CEO saliente a sigui informá.
Mas aleu sr. Da Costa Gomez a bisa ku na su opinion no tin un maneho general pa e ret di kuido di salú. “Kada entidat ta move riba su propio kaminda i tin su propio agènda den kua hopi biaha no ta tene kuenta ku e otronan ku tambe ta parti di e ‘ret’. Esaki hopi biaha ta trese frikshon entre e diferente entidatnan, desakuerdonan ku asta mester bai korte pa purba solushoná. Ta nota ku e kalidat di bida di e kliente mes no ta esun ku ta bin na promé lugá.” Sr. Da Costa Gomez a hasi un yamada na tur partisipante den e ret di kuido di salú pa ban manehá e ret huntu pa medio di mihó komunikashon ku otro. “Ban traha riba solushonnan inovativo i duradero ku mester pèrkurá pa mihó kalidat di bida di nos klientenan. Finalmente esei mester ta e meta ku mester keda pone dilanti.”
E CEO nobo di Manrique Capriles, sr. Michael ‘Mike’ de Koning na su turno a gradisí sr. Da Costa Gomez i tambe sr. ‘Neetje van der Veen, kende huntu ku e personal di Manrique Capriles, a traha ku alma i kurpa pa salbaguardiá eksistensia di e kompania i ku último añanan a bolbe kuminsá hasi ganashi, tantu na Kòrsou, komo na Aruba. “Nan a pone un base sólido riba kua mi persona, komo e CEO nobo, i mi tim di kolaboradó lo sigui bòrda riba dje.”
Manrique Capriles ta propiedat di yunan di sr. Bart Moulijn, kende a fayesé na 2018. Sr. Moulijn pa vários aña a traha den kolaborashon estrecho ku sra. Carol Capriles kende na aña 2008 a sali di MC Group. Banda di benta por mayor di produktonan medisinal, aktualmente e kompania ta dediká tambe na benta i ‘lease’ di aparatonan pa hasi diagnóstiko.
