RELATO ANUAL 2022 DI GABINETE PISAS II

Kerido Pueblo,

Nos ta na final di aña 2022 i e ta na su lugá pa nos por duna un bista di tur loke e Gobièrnu aktual a bini ta hasi konkretamente.
Nos ta bai hasié un kustumber pa anualmente tin un relato pa asina tene nos komunidat aun mas informá.

E ta importante pa nos komunidat sa ku e Gobièrnu aktual no ta sinta ketu i ku ta trahando riba tur lei, struktura i tratadonan ku mester tei pa nos por realisá e kosnan di mas importante ku nos ke logra pa nos komunidat.

Nos tin un Programa di Gobernashon i nos ta trahando a base di e programa aki i tambe e “Landspakket” ku nos a bin haña riba mesa.

Nos tin komprenshon pa ku e hansha ku tin, nos sa ku ta wardando hopi tempu pa mira e kambionan nesesario, i apesar di tur e retonan, nos ta keda pidi pa tene un poko mas di pasenshi, fé i konfiansa, i nos lo yega na tempunan muchu mas faborabel pa nos komunidat.

E aña i mei ku a transkurí a sirbi pa buta un fundeshi sólido, pa nos por plania, prepará maneho i leinan nesesario, pa por sigui dal bai i logra aun muchu mas resultado positivo pa nos komunidat su bienestar.

Nos lo amplia riba kada ministerio su logronan, pa ku e aspekto general, pa asina e bista por ta mas kla pa un i tur.

Pa ku e Ministerio di Asuntunan General:

1. Nos a finalisá hopi tratado manera entre otro: Tratado relashoná ku pagamentu di ámtenarnan/profeshonalnan bou di mesa ora ta trata di transakshonnan internashonal;
2. Protokòl fakultativo relashoná ku bendementu di mucha, prostitushon di mucha/ menor di edat i pornografia di menor di edat, relashoná ku derechi di mucha;
3. Tratado internashonal pa kombatí aktonan di terorismo nuclear;
4. Tratado ku ta enserá munishon agrupá;
5. Tratado ku ta enserá rekonosimentu i ehekushon di verediktonan internashonal den kasonan sivil i komersial;
6. Protokòl adishonal na e tratado di Den Haag pa loke ta trata rekonosementu i ehekushon di verediktonan internashonal den kasonan sivil i komersial;
7. I Protokòl pa kombatí aktonan di violensha na aeropuertonan pa aviashon sivíl pa loke ta trata tratado pa Kombatí aktonan relashoná ku Seguridat di aviashon tratá na Montreal dia 23 di sèptèmber 1971.
8. A kontribuí na promoshon di e kalidat di nos estado di lei, dor di sostené tur e 9 ministerionan ku konseho hurídiko di kalidat haltu, pa asina pa evitá riesgo hurídiko i/òf finansiero;
9. A kuminsá ku e trayekto di teksto di lei vigente (Geldende Tekst Project) komo implementashon di e Landspakket, pa asina nos leinan por reflehá e struktura konstitional aktual;
10. A solushoná e retraso ku tabatin na Huurcommissie;
11. A logra ku Gobièrnu di Kòrsou ta kompartí desishonnan di Konseho di Minister ku tin spesífikamente di haber ku asuntunan di País, riba nivel nashonal, ku nos komunidat;
12. Den yüni 2022 a kuminsá na kanselá e Estado di Emergensia, no a alargá e Landsbesluit;
13. Dia 4 di ougùstùs 2022 a kanselá e situashon di Krisis i “Trek in” e plan di desaste, pa nos pais por a kuminsá bai bèk na normalidat;
14. A manehá menasanan di sistemanan ku a menasá Kòrsou;
15. A tuma e desishon pa adaptá Korsou su profiel di riesgo. E deadline ta febrüari 2023;
16. A tuma desishon pa start trayekto di Adaptashon Plan di Desaster di Kòrsou pa Plan di Krisis, manera e lei ta eksigí;
17. A disidí pa kontinuá i finalisá e realisashon di e Crisiscentrum di Kòrsou;
18. A inisiá trayekto pa huntu ku otro servisionan mehorá maneho pa Cybersecurity;
19. A inisiá e trayekto huntu ku otronan pa ku menasa di Kambio di Klima;
20. E kos di mas grandi ku nos a logra ta pa mantené un relashon stabil ku tur Pais den ku Reino, mantené un bon relashon i apertura di dialogo konstante ku Hulanda, mantené un Gobièrnu stabil i proaktivo, krea diferente apertura i kontakto regional i internashonal pa Kòrsou, i mantené sigur e pas i trankilidat ku mester tin den Gobernashon i tambe nos komunidat.

Pa ku e Ministerio di Tráfiko, Transporte i Planifikashon Urbano:

1. Ta ehekutando 5 proyekto grandi di mantenshon di kaminda, i a otorgá un total di 1112 pèrmit di konstrukshon ku konhuntamente ta un invershon ekonómiko total di 417 mion florin;
2. A finalisá mas ku 650 dossiers di otorgamentu di tereno, i ku esaki a logra alkansá mas ku 2.5 mion florin di entrada èkstra pa kaha di Gobièrnu via di hür i èrfpagt;
3. A kùr 75.331 vehíkulo i a instalá un asina yamá “teststraat” na Keuringslokaal pa optimalisá e kùrmentu di vehíkolonan pa garantisá un tráfiko sigur;
4. A duna un kantidat di 627 ontheffing pa koredonan di Bùs;
5. A duna pèrmit di konstrukshon pa kuminsá traha 67 bibienda na Tera Kòrá;
6. A aprobá e Programa “grond en vastgoed” (E6/E7) ku ta konsistí di 12 proyekto;
7. A logra haña 18.2 mion di euro di Union Europeo pa drecha e sistemanan di “Waterzuiveringsinstallaties” di Klein Hofje i Tera Kòrá;
8. E maneho pa glasnan skur a ser aprobá i a keda implementá;
9. A logra aprobashon unánimo di Parlamento pa introdukshon di e “Passenger Facility Charge”;
10. A establesé un Plataforma di Kambio di Klima pa Kòrsou i ta preparando e IMSAS (MO Member State Audit Scheme) audit pa bin ku un “businesscase” pa un registro di barku nobo.

 

Pa ku e Ministerio di Desaroyo Ekonómiko a lográ:

1. Un bahada di 0.17 sèn riba kombustibel;
2. Analisá e kalidat di Gasoline i Diesiel;
3. Firma un MOU ku Trinidad pa hasi negoshi komersial bilateral;
4. Finalisá “National Export Strategy;
5. Pa trese 4 Barku Krusero di e kategorianan mas grandi pa promé bes Kòrsou;
6. Pa subi kantidat di vuelonan ku Merka.

Pa ku e Ministerio di Finansa a logra:

1. Entrada mas haltu di impuesto ku promé ku Covid;
2. Aprobashon di Parlamento pa ku e “Landsverordening Normering Topinkomen, un lei tin 8 aña pará;
3. A paga masalmente restitushon den 2022 i den novèmber 2022 pago di 15.5 mion na restitushon;
4. Pago di gratifikashon di Fl. 1750 pa tur ambtenar, dosente, fundashon i frontliners di CMC;
5. Drai bèk e 12.5% for di ambtenar i dosentenan ku forsa retroaktivo te ku promé di yüni 2022;
6. Drai bèk e 25% for di Minister i Parlamentarionan.

Pa ku e Ministerio di Hustisia a logra pa:

1. Optimalisá e sistema di seguridat i kamaranan di seguridat den Sentro di Detenshon i Koreskhon Kòrsou (SDKK) pa garantisá mas seguridat;
2. Inisiá diferente proyekto di resosialisashon pa klientenan di SDKK;
3. Fortifiká e direkshon di Kuerpo Polisial di Kòrsou dor di nombra hefe di kuerpo polisial i hefe di asuntunan operashonal;
4. Duna un enfoke dirigí riba prevenshon di kriminalidat ku a redundá den bahada di robo di outo ku 47% i un bahada den atrako armá ku 42% kompará ku aña 2021;
5. Sigui implementashon di e segundo fase di e proyekto di Kamara pa kombatí krímen i infrakshonnan den tráfiko;
6. Finalisá e area di kushina na SDKK i e area nobo pa indokumentadonan (VODC);
7. Huramentá 25 agente polisial pa fortikfiká Kuerpo Polisial di Kòrsou;
8. Habri 25 vakatura pa pa fortifiká Brandwer Kòrsou;
9. Outorisá e abogado general di Kòrsou pa ofresé asistensia hurídiko na personanan di ménos rekurso ku 4 abogado (pro deo);
10. Pone mas fotifikashon di kòntròl na frontera ku asistensia di Wardakosta;
11. Aprobashon di e Plan di Akshon pa Trafikashon di Hende Kòrsou 2022-2026;
12. I subi e kantidat di notario mirando e eskases agudo di notario na Kòrsou.
    

 

Pa ku e Ministerio di Enseñansa, Siensia, Kultura i Deporte a logra pa:

1. Start e Implementashon di e Maneho di Idioma i ta bai lanta e grupo piloto ku ta bai dirigí i guia e implementashon kaminda skolnan lo haña mihó bista kon ta trata ku idioma estranhero den enseñansa;
2. Kuminsá ku Implementashon di Maneho pa enseñansa spesial;
3. Start ku kurso “disiplina konsiente” pa maestronan kaminda ta bai pone énfasis riba detektá tempran seka e mucha kualke situashon sosial emoshonal ku por tin konsekuensia pa su siñamentu;
4. Tèrminá e Manual di Herensia Kultural pa por drenta skolnan i komunidat (barionan) den forma digital, pa asina elevá e sentido di Patriotismo;
5. Realisá Fondo pa Deporte i ta trahando riba kambio di lei pa oumentá e kantidat di sèn ku e ta generá;
6. Pone den operashon e Komishon pa referí alumno na skol speshal i ta bai duna konseho pa referí alumno:
   • Digitalisashon di enseñansa i tambe di ministerio ta operashonal pa loke ta trata e promé fase. Den skolnan e infrastruktura ta 80% kla i tur maestro i alumno ta registrá den e sistema;
7. Realisá 4 skol integral (konsepto brede school);
8. Duna sosten na:
   • Instalashonnan di Lus di Led na Frank Curiel Ball park;
   • Transmishon di FIFA World Cup Qatar;
   • I sosten finansiero na  Van Engelen Ball Park Foundation pa drecha fasilidat deportivo di SUVEK.

 

Pa ku e Ministerio di Maneho di Gobernashon, Planifikashon i Servisio Públiko a logra pa:

1. Traha duru pa pone un mihó base pa e servisio interno, esta na otro ministerionan i e servisio na komunidat;
2. Invertí den sistemanan digital nobo ku lo yuda avansá e konosementu i e abilidat básiko nesesario pa duna mihó servisio;
3. Sigui invertí den e asina yamá “Functioneel Systeem” pa logra digitalisá mas servisio na komunidat;
4. Pone e promé paso pa yega na un Aparato Públiko renobá ku ta fasilitá un mihó servisio;
5. Aprobá e plan pa adaptá e struktura di ‘topkader’ i lo sigui despues ku revishon di sobrá di e Aparato Públiko;
6. Invertí den preparashon pa den e próksimo lunanan Departamento di Reibeweis por tin 6 eksaminadó mas pa sirbi komunidat;
7. I firma un MOU ku Hulanda pa implementá e asina yamá E-depot na Archivo Nashonal pa Kórsou por garantisá e akseso pa suidadano na tur archivo di Gobièrnu i nan desendiente legal.

 

Pa ku e Ministerio di Salubridat, Medio Ambiente i Naturalesa a logra pa:

1. Inisiá e trayekto di un akuerdo di koperashon entre e 4 paisnan den Reino riba diferente tópiko di salú, e asina yama Dutch Caribean Alliances (DCA);
2. Inisiá programa di bakunashon di HPV pa muchanan entre 9 pa 10 aña;
3. Habri atrobe e Abatuar na Barber pa matansa di Kabritu i Karné;
4. Aprobashon pa bini ku 3 Ambulans nobo pa Fundashon Kuido di Ambulans;
5. Inisiá e kambio di lei di molèster pa bini ku normanan den lei;
6. Introdusí aña di limpiesa;
7. Drecha diferente playa;
8. Formalisá akuerdonan di koperashon riba tereno di Agrikultura entre diferente instasianan i entre tur e 6 islanan;
9. Inisiá e “Dutch Caribbean Visioning Process” entre e 6 islanan i Hulanda pa mas koperashon riba tereno di Agrikultura i Peska;
10. Inisiá e proseso pa ordená Haf di Piskado na Caracasbaai;
11. Inisiá kolaborashon ku e Ministerio di Landbouw, Natuur en Voedselkwaliteit (LNV) i Rijksdienst voor Ondernemend Nederland (RVO) na Hulanda;
12. Partisipá na konferenshanan internashonal pa komparti balor- i konosementu di e Eco-sistema Marítimo di Kòrsou i asina promové Kòrsou su parti di Oceano ku mundu;
13. Sostené proyekto di kria di Karko pa abastesé i fortifiká nos lamanan ku e bida di e espesienan aki ku ta sufri di sobre peska;
14. Duna servisionan regular di “ploegbeurt”, partimenti di Awa, mula maishi i duna konseho na Agrikultornan;
15. I duna pèrmitnan riba tereno di Medio Ambiente i Naturalesa na inisiativanan i proyektonan ekonómiko pa Kòrsou.

 

Pa ku e Ministerio di Desaroyo Sosial, Labor i Bienestar a logra pa:

1. Subida di sueldo mínimo ku 11%;
2. Aksesibilidat di awa pa tur siudadano;
3. Promé parti di e proyekto Bibiendanan di Emergensia;
4. Hasi “groundbreaking” pa kuminsá ku konstrukshon di 36 Kas Sosial na Tera Kòrá;
5. Pone fondo disponibel na Reda Sosial pa mantenshon di kasnan ku ta den situashon mas agudo;
6. Lanta un “Unidat di Supsidio” pa atendé asuntunan di supsisio mas responsabel;
7. Bonus di Onderstant den kuadro di subida di kosto di bida;
8. Èkstra entrada pa esnan desabilitá ku tin un Onderstant;
9. Fortifikashon di kasnan di bario ku 40 trahadó èkstra pa mehorá servisio;
10. Subida di Onderstant pa e grupo di entre 60 pa 64 aña ku 7%;
11. Subida di toelage pa nos grandinan ku tin entrada di AOV só ku 19%;
12. I kuminsá ku e proyekto di “E hóben”, ku e proyekto komunitario limpiesa di bario na Tayer Sosial Sta. Martha, ku un ‘werkervaringstraject’ na Total Services; i ku e proyekto di resiklahe “Waste no More”.

 

E ta bon pa nos komunidat sa ku e Gobièrnu aktual a komprondé i ta konsiente di e retonan di nos komunidat i a hasi esaki su mishon, pa di un forma kreativo i responsabel, focus riba solushonnan ku ta hiba na  bienestar di nos komunidat.

E relato aki ta duna un bista di tur loke nos a hasi den 2022, den kuadro di e Programa di Gobernashon i e “Landspakket”, semper ku bista riba e bienestar di nos komunidat, paso nos a bisa ku e ta Pueblo su Bùrt!

Na promé lugá nos ta rekonosé Dios Tata su yudansa, pa medio di su yu Kristu Hesus, durante ana 2022 aki i ta agradesido ku nos logro nan.
Mi ke gradisí tambe di kurason kada Minister di mi Gabinete, kendenan ta trahando inkansabelmente pa sirbi nos komunidat di un forma responsabel. Sigur un danki speshal ta bai pa tur e empleadonan públiko, ku a i ta trahando bou di hopi preshon pa kosnan ku tin ku tuma lugá.

Un danki ta bai tambe na tur  otro instansia ku ta sostené e Gobièrnu aktual pa nos por sigui realisá un mihó porvenir pa nos komunidat.

Un abraso fuerte i un danki speshal ta bai tambe na tur nos Parlamentarionan ku tin bienestar di nos pueblo na promé lugá i ku ta komprondé i sostené e direkshon ku Gabinete Pisas II ke bai.

I na nos komunidat, na boso tambe un danki di kurason pa boso FÉ i pa sigui Kere den nos. Sí ABO pueblo tur dia di nobo ta nos motivashon pa sigui karga speransa di mira nos vishon kumplí, esta pa hasi Kòrsou e Perla di Caribe!

Tiru ta bai tira un bes pa será e aña 2022 i boso Gobièrnu di Kòrsou ta kla pa nos tur huntu drenta 2023 ku e mesun energia, ánimo, speransa, perseveransa, kurashi i determinashon pa sigui traha pa abo su bienestar.

Tin hopi trabou ainda pa hasi, e situashon no ta fásil, pero esakinan ta ingrediente pa fortalesé e mentalidat di reseliensia.
Hamas pensa ku e ta “imposibel’ sino “E ta POSIBEL”. Semper pensa ku e ta posibel pa por logra prosperidat i bienestar konkreto pa nos komunidat. Nos lo sigui traha duru ku perseveransia pa transformá retonan den oportunidat.

Aña 2023 nos ta kla pa sigui asumí e responsibilidat pa dirigí i goberná nos Pais!

Ku Dios tata Todopoderoso drama tur su bendishon, amor i pas riba nos komunidat awor i pa semper den nòmber di Kristu Hesus.

Pueblo di Kòrsou, un felis Aña Nobo.

 

Gilmar Pisas
Minister Presidente di Kòrsou