KUMBRE POLÍTIKO NA ST. MAARTEN

WILLEMSTAD – Di 10 pa 15 di yanüari 2023, Promé Minister Gilmar Pisas i Vise Promé Minister, señora Ruthmilda Larmonie-Cecilia, ta partisipá na un kumbre polítiko entre Aruba, Kòrsou, Sint Maarten i Hulanda na kua okashon lo diskutí diferente temanan importante pa relashonnan den Reino Hulandes.

Ta asina ku na novèmber 2020, gobièrnunan di Aruba, Kòrsou i Sint Maarten a firma un areglo ku Hulanda pa implementá sierto reformanan pa reforsá sektor públiko den e paisnan. Esaki tabata e asina yamá Pakete Pais (Landspakket) ku entre tantu tin 2 aña den ehekushon. Pa yega na palabrashonnan konkreto kon ta sigui e añanan benidero, Gabinete Pisas 2 huntu ku gobièrnunan di Aruba i Sint Maarten a palabrá pa hasi un proposishon pa yega na un areglo nobo di supervishon riba implementashon di e reformanan menshoná. Esaki ta e tópiko prinsipal di e kumbre na Sint Maarten na kua e delegashon enkabesá pa Promé Minister Pisas ta partisipá. Gobièrnunan di Aruba, Kòrsou i Sint Maarten huntu ku Hulanda ademas lo deliberá riba otro temanan importante pa e relashonnnan den Reino.

Riba djabièrnè 13 di yanüari, hefenan di e delegashonnan lo tene un konferensha di prensa kaminda lo divulgá konklushonnan di e kumbre. E konferensha di prensa lo keda di stream via di e website di Gobièrnu di Kòrsou.