Resúmen di un siman di tristesa polítiko Di parlamento negligente pa reunion di gai pilon.

Willemstad — Partido PIN ta stempel e di dos siman di aña komo un di desepshon polítiko. Ta minister Cooper so a duna aliento ku tantu komunidat mester.

 

Wega

Den e siman di 9 pa 13 di yanuari pueblo a konstatá:

1. Ku un presidente di staten, apesar di a risibí oposishon su petishon pa reunion públiko for di 29 di desèmber, sin ningun ripara ta deklará ku no por a yama tal reunion promé ku minister presidente bai afó 12 dia despues ku e petishon a drenta. Aya banda, petishon pa un komishon sentral si por a keda yamá den 3 dia. Pregunta: ta negligensia, privilegio intenshonal òf remote control di partido den akshon?;
2. Ku koalishon ta pidi un reunion di komishon sentral ku meta p’e invitadonan pone dokumento riba mesa pa amplia informashon rondó dje asuntunan di refineria, pero na inisio dje reunion e mes koalishon ta vota pa NO presentá dokumento. Pregunta: ta pakiko a pidi e reunion anto?;
3. Ku lider di koalishon ta pretendé ku ‘indieners’, esta esnan ku a pidi e reunion, ta ‘doño’ di e reunion ei di parlamento. Pregunta: ‘indieners’ lo paga gastunan konektá ku e reunion ei ya ku supuestamente ta nan ta doño?

 

Un lus

Sinembargo danki Dios pueblo por a mira bèk tambe riba un minister Cooper, ku di un forma madurá, a sigui elaborá riba su plannan grandi pa atendé ku infrastruktura i renová nos transporte públiko kuminsando ku un proyekto piloto na Bándabou. Tur esaki miéntras ku e mes minister Cooper a ofresé un forma di alivio na penshonadonan ku ta hür serka FKP.

 

For di e akshonnan aki di sr. Cooper Partido PIN ta konkluí ku otronan den gobièrnu Pisas tin ehèmpel pa sigui masha bon.

Ta na komunidat pa ta skèrpi riba loke mesté drecha i apoyá loke ta bai den bon direkshon.