Minister Shalten Hato Bishita na Departamentu di Hustisia Merikano, Departamento di Estado Merikano i DEA

Ayera, 10 di yanuari 2023, Minister Hato i su delegashon a sali pa Washington, DC na Merka pa asina hiba kòmbersashon ekstenso ku Departamento di Hustisia Merikano i Departamento di Estado Merikano tokante un suma kuantioso ku pais Kòrsou mester risibí. Adishonalmente lo hiba kòmbersashonnan ku miembronan di DEA, outornan di rapòrt TIP i departamentunan di NGO’s ku tin ‘’dependance’’ aktivo na Kòrsou i ku ta aportá den prevenshon di trafikashon humano.
E delegashon di Ministerio di Hustisia lo reuní ku Departamento di Estado Merikano i Departamento di Hustisia Merikano pa negoshá kon pa risibí e plakanan ku nan tin di vris di aktonan kriminal ku de fakto ta pertenesé na Kòrsou. E montante aki di alredor di 30 mion dollar ta destiná pa Crimefonds. E suma aki ta di sumo importansha pa nos pais pa asina Ministerio di Hustisia por huza esaki pa entre otro trayektonan di resosialisashon di klientenan di Sentro di Detenshon i Korekshon Kòrsou, kumpra material pa Kuerpo Polisial di Kòrsou i tambe hasi invershonnan den programanan di resosialisashon.
Banda di esaki Ministerio di Hustisia ta lamentá ku a baha Kòrsou su klasifikashon den e asina yama rapòrt TIP na Tier 3. Esaki ta e klasifikason mas abou ku ta duna indikashon ku no ta kumpli ku e puntonan enkuanto kombatimentu di trafikashon humano. Minister Hato ya a ekspresá su preokupashon pa e forma ku e rapòrt ta relatá Kòrsou. Su preokupashon ta e forma kon ta yega na e informashon i ku no tin un espasio pa reakshoná promé ku e rapòrt wòrdu publiká. No ta indiká di unda e informashon ta bini ni ken ta esnan ku ta informá departamento di estado aparte di Gobièrnu.
Aparte di esei departamento di estado ta produsí un lista di pregunta i no ta duna espasio pa amplia riba e lokual nan ku e pais sí por a hasi i e logronan ku el a obtené den e aña konserní. Ehèmpelnan di esaki ta inkluí varios seshon di entrenamentu, kampañanan di konsientisashon i ehekushon di e instrukshonnan duná dor di departamento di estado den TIP 2020 i 2021. No opstante e problematika di Covid i defesit finansiero ku Kòrsou ta konfrontando, Gobièrnu a kumpli ku 9 di e 11 instrukshonnan duná dor di departamento di estado Merikano.
Den e reunionnan planiá ku Departamento di Estado Merikano i tambe Departamento di Hustisia Merikano, Minister Hato lo suprayá e diferente proseduranan legal andando kual ta demostrá e esfuerso inkansabel pa kombatí e fenomeno ya menshoná. Gobièrnu tin atenshon pa e severidat di trafikashon humano i ta komprometé su mes pa kombatí esaki.
Share this page to Telegram

This site uses Akismet to reduce spam. Learn how your comment data is processed.

%d bloggers like this: