SRA. ANDREA RODEBAUGH I SRA. LORENA SOTO GIUBI DI FIFA TABATA NA KÒRSOU KU PROGRAMA PA YUDA ENGRANDESÉ FUTBÒL FEMENINO!

SRA. ANDREA RODEBAUGH I SRA. LORENA SOTO GIUBI DI FIFA TABATA NA KÒRSOU KU PROGRAMA PA YUDA ENGRANDESÉ FUTBÒL FEMENINO!

 

 

Den e último añanan tras di Lomba FIFA a bin ta pone hopi atenshon na e kresementu i desaroyo di futbòl femenino serka tur miembro asosiá. Den kuadro di esaki FIFA ta ofresé guia, yudansa i e fondonan nesesario pa tur miembro por alkansá nan metanan pa ku desaroyo di futbòl femenino. Mirando e kresementu i interes ku futbòl femenino ta konta kuné durante e delaster tempu aki na Kòrsou, FFK ku ta miembro di FIFA tambe a hasi petishon pa e programa aki kaminda e desaroyo di futbòl femenino ta e punto sentral.

 

Komo parti di e plan aki di 12 pa 15 di yanüari tras di lomba FFK a risibí bishita di Sra. Andrea Rodebaugh i Sra. Lorena Soto Giubi ku ta ofisialnan di FIFA ku a bin pa analisá nos situashon, duna guia, sosten i konseho na FFK i tambe Komishon Femenino pa ku organisashon di tantu nos Kampionato Femenino i selekshonnan femenino en general.

 

Durante e estadia di e representantenan di FIFA aki na Kòrsou, nan a bishitá training di selekshon femenino kategoria U-20 ku lo tin algun kompromiso internashonal proksimamente i a presensiá diferente partido di Kampionato Femenino ku a tuma lugá durante wikènt.

Tambe nan a tene diferente seshon informativo ku e ekiponan ku ta partisipando na nos kampionato, dirigentenan, entrenadónan i tambe hungadónan ku tabata interesá pa sigui e presentashonnan aki kaminda FIFA a presentá nan plannan pa futuro i kiko tur esaki por nifiká pa futbòl femenino aki na Kòrsou.

Mas ku klaro nan a reuní ku direktiva di FFK, Komishon Femenino, spònsernan, departamentu tékniko i representante di Gobièrnu di Kòrsou pa interkambiá di idea i plantia e proyektonan grandi aki ku por benefisiá nos futbòl femenino na diferente manera.

 

Un bishita sigur hopi informativo i fruktífero tantu pa futbòl femenino pero tambe pa Kòrsou kaminda FFK i FIFA lo traha konhuntamente pa mehorá i enforsá futbòl femenino.

FFK lo keda en espera pa e aprobashon pa e programa aki ku lo konta ku fondonan i tambe material pa nos damanan.

Kosnan grandi ta na kaminda pa futbòl femenino i nos damanan aki na Kòrsou, keda pendiente pa mas informashon.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: