FELIS DIA INTERNASHONAL DI EDUKASHON 2023

WILLEMSTAD – Awe riba dia Internashonal di Edukashon, Minister di Enseñansa, Siensia, Kultura i Deporte (ESKD), sr. Sithree van Heydoorn ta para ketu na e echo ku nos formashon, edukashon i enseñansa mester di mas atenshon. Ta huntu komo komunidat nos mester sigui traha pa mehorashon di nos enseñansa. Kada un di nos mester duna di nos parti i hasi enseñansa un kousa nashonal.

Pa implementá kambio signifikativo i mehorá nos enseñansa, mester reformá i fortifiká organisashonnan institushonal, kontenido, infrastruktura, metodologia i teknologia. Tambe mester profeshonalisá tur esnan ku tin un tarea riba e tereno di formashon, edukashon i enseñansa.

Mi vishon ta pa huntu forma e siudadano di forma holístiko pa e bira e hende ku pleno kapasidat i potensial ku e identidat kolektivo pa partisipá di un forma outónomo, responsabel, konstruktivo i kontribuí asina na desaroyo sosial, ekonómiko, kultural i spiritual di nos sosiedat. Esaki mi a tambe presentá riba dia di enseñansa 1 di desèmber 2022.

Un palabra di apresio i gratitut na tur ku ta traha den e área di formashon, edukashon i enseñansa (manera maestro, dosente, personal no-dosente, direktivanan di skol, sindikatonan, trahadónan sosial/kultural, lidernan i koleganan di ministerio di ESKD). Tambe mi ta animá tur mayor pa sigui forma i guia nos muchanan. Boso aporte ta sumamente importante pa desaroyo di nos komunidat.

P’esei mi ta hasi un yamada na kada siudadano di Kòrsou pa huntu ban traha na mehorashon di nos enseñansa i guia nos yunan na éksito.

Danki pa e bon trabou i ban sigui empoderá nos komunidat.

Felis dia Internashonal di Edukashon!

—

Boso sirbidó,

Sr. Sithree van Heydoorn

Minister di Enseñansa, Siensia, Kultura i Deporte.

 

**Informashon dia Internashonal di Edukashon 2023.

Nashonnan Uní a dekretá 24 di yanüari komo e dia Internashonal di Edukashon. Tema sentral den esaki ta pa invertí den hende i pone prioridat na edukashon. Ta e intenshon pa huntu mobilisá transformashon polítiko pa ku edukashon i enseñansa pa asina insentivá e kompromiso i inisiativanan den e área aki. Edukashon mester keda prioridat pa aselerá e progreso di metanan sostenibel (SDG) pa asina por kombatí tur e konsekuensianan ku reseshon global, krísisnan klimatológiko i desaroyonan ku ta trese desigualdatnan. UNESCO ta dediká e dia Internashonal di Edukashon aki spesialmente na mucha muhé i hende muhé di Afganistan, ku no ta haña oportunidat di siña i studia. Nan ta kondená e atakenan serio kontra nan komo ku e derechi aki ta un derechi fundamental di humanidat. Paso e ser hende muhé ta forma parti integral di humanidat global.   (https://www.unesco.org/en/days/education)