FFK KU HAN UNIVERSITY OF APPLIED SCIENCE A SERA UN KOMBENIO PA TRESE STUDIANTENAN DI HULANDA PA KORE ‘STAGE’ NA FFK!

Federashon Futbòl Kòrsou i HAN a drenta un kombenio pa e próksimo añanan pa trese ‘stagaire’ na FFK. HAN ta un universidat na Hulanda spesialisá den e ramo di ‘sportkunde’ ku ta dirigí su mes riba e estudionan ku tin di haber ku deporte, moveshon, análisis, desaroyo i struktura den deporte. Tambe estudionan manera ‘lichamelijke opvoeding’, ‘applied data science’, ‘organisatiekunde’ i merkadeo lo duna un aporte na FFK. Kada aña eskolar lo habri kuponan pa mas studiante por kore ‘stage’ na FFK (huntu ku e ‘stagaire’ nan lokal) i trese nan konosementu i yuda engrandesé futbòl aki na Kòrsou.

 

Presidente di FFK, Sr. Ramiro Griffith ta hopi kontentu ku e kolaborashon aki, debí ku FFK ta den un proseso di kresementu p’asina bira aun mas profeshonal. E proseso aki ta trese proyektonan interesante i benefisioso pa FFK i futbòl en general. E ‘stagaire’ nan aki sigur por duna un aporte na esakinan mirando e ramo ku nan ta studiando i mas ku klaro esaki tambe por ta un eksperiensia úniko pa nan tambe siña traha na un otro pais, ku otro kultura.

 

Dentro di un par di siman e promé studiante lo ta na Kòrsou pa kuminsá ku su periodo di ‘stage’ na FFK. E lo bai ta na enkargo di desaroyá e struktura nobo i e komersialisashon di nos kampionatonan. Tambe e lo sostené kantor durante nos próksimo partido di Nations League kontra Canada, dia 25 di mart próksimo aki na Kòrsou i ku e torneo di CONCACAF U-20. Pues e lo ta un sosten den diferente trabou ku lo kuminsá proksimamente.

 

“Nos ta instruí nos studiantenan di tal manera ku nan por yuda den diferente área di deporte i moveshon. Ku e kolaborashon aki, FFK lo duna e studiantenan tambe e chèns di por pone den práktika tur loke nan a siña durante nan estudio”, Wouter Jansen, dosente di HAN a bisa.

Debí ku Sr. Wouter Jansen ta e ‘team manager’ di nos selekshon nashonal, el a tuma e inisiativa i aserká FFK ku e proposishon pa un kolaborashon, ku FFK a aseptá ku man habrí mirando ku esaki lo ta benefisioso pa FFK. Den luna di sèptèmber 2023 e grupo di ‘stagaire’ lo bira mas grandi i nan lo duna un man den diferente área di FFK, selekshonnan hubenil i lo yuda den proyektonan ku lo tin hopi benefisio pa futbòl i nos komunidat.

 

31 yanüari 2023