Pregunta na Minister Silvania tokante kanselashon di debe di impuesto di 2017 i promé.

 

Na: Minister di Finansa

Sr. Javier Silvania

Pietermai 4-4A

Presente

 

Willemstad, 6 febrüari 2023

 

Tópiko: Pregunta na Minister Silvania tokante kanselashon di debe di impuesto di 2017 i promé.

 

Honorabel sr. Silvania,

Nos a tuma nota di un publikashon dia 28 yanüari 2023 riba Facebook di minister di Finansa, kaminda sr. Silvania ta proklamá ku tur debe di impuesto di 2017 i promé a wòrdu kanselá. Di parti gobièrnu di Kòrsou mes no a sali un komunikado ofisial ni tampoko un Landsbesluit unda ta ofisialisá e kanselamentu di debe di impuesto di 2017 bai abou. Esaki ta trese kuné ku tin hopi konfushon tokante e tema aki, sigur serka esnan ku tin areglo di pago ku ofisina di impuesto pa ku nan debe Tampoko Minister di Finansa no a duna niun splikashon di rason dikon a tuma e desishon aki ni di e impakto ku esaki tin riba e presupuesto di pais.

Manera ku nos tur sa, pago di impuesto ta sumamente importante pa kaha di gobièrnu. Ya ku den presupuesto di gobièrnu di tur aña, ta netamente impuesto (belasting) ta e fuente di entrada ku gobièrnu tin mester i ta tene kuenta kuné pa por duna servisio na komunidat dor di kumpli ku nesesidatnan di nos pueblo ku tin mas mester di dje manera ònderstant, supsidionan na instanshanan, invershon nan importante i muchu mas.

Pa e rasonnan ariba menshona. nos lo ke sa di Minister Silvania, lo siguiente:

• Kua tabata e motivashon di Minister di Finansa pa tuma e desishon aki?
• Riba kua dia ta saka e Landsbesluit unda ta ofisialisá e kanselashon di tur debe di impuesto di 2017 i promé?
• Kua ta montante total ku nos ta papiando di dje si kanselá tur debe di impuesto di 2017 i promé ?
• Kua ta konsekuensia esaki tin riba e presupuesto (meerjaren) di pais?
• Kua ta e señal ku esaki lo duna na e bon pagadó di impuesto?

 

Nos ta spera ku minister Silvania lo kontesta e preguntanan aki, mas pronto posibel pa trese klaridad serka pueblo.

 

Atentamente,

Steven Croes

Frakshon di PAR