Petishon Komishon Sentral riba e topiko Salu Mental E Pandemia Silensioso

Presidente di Parlamento

Sra. C. America – Francisca

Wilheminaplein #4

Presente

 

Kòrsou, 6 febrüari 2023

 

Tópiko: salú mental e pandemia silensioso

 

Apresiabel presidente di Parlamento sra. America-Francisca,

 

Segun World Health Organization (WHO) salú mental despues di COVID ta un parti di salú públiko ku nos no por bira kara mas p’e. Durante i despues di  COVID por a mira un subida drástiko di nesesidat di asistensia emoshonal, sikológiko i sosial. Organisashon, instituto i profeshonalnan di kuido a sinti e efekto aki di forma direkto, muchu mas kliente a yega na nan porta. Tambe komo pais, nos por a tuma nota di e debilidatnan den e kadena di kuido mental. PSI-Skuchami komo e instituto ku ta ofresé  kuido ambulante pa salú mental  ta duna un bista amplio di e desaroyonan den nos komunidat.

Salú mental ta sumamente importante pa kada persona, e ta afektá kon un hende ta prosesá informashon, tuma desishon i manehá bida en general. Miedu, hansha i inseguridat komo sentimentunan negativo a oumentá, ku tur e konsekuensianan ku esaki ta trese di dje. Komo pais nos por a mira e konsekuensia di esaki den diferente forma, entre otro den e subida den kasonan di violensia, abuso di alkohòl i depreshon.

Komo miembronan di Parlamento, e tema aki ta di balor grandi pa deliberá riba dje. Hasiendo uso di e plataforma di Parlamento nos por krea konsientisashon pa e tópiko, pero tambe haña informashon ku por keda usá pa deliberashon ku Parlamento den futuro lo mester hiba.

Hasiendo uso di artíkulo 33 di reglamentu di òrdu, frakshon di PAR ta pidi Presidente sra. America-Francisca pa yama un reunion di komishon sentral, ku e tópiko ariba menshoná i alabes invitá representantenan di PSI-Skuchami pa duna un presentashon tokante nan eksperensia.

 

Danki di antemano,

Miembronan di Parlamento, Partido Alternativa Real