Reakshon riba rapòrt di Amnesty International enkuanto indokumentadonan Venezolano

MINISTER Shalten Hato

Reakshon riba rapòrt di Amnesty International enkuanto indokumentadonan Venezolano
Ku asombro Minister di Hustisia, sr. Hato a tuma nota ku Amnesty International a skohe un biaha mas pa traha un rapòrt negativo tokante país Kòrsou. Minister di Hustisia ta refutá kategorikamente ku no tin adelanto den e prosesonan migratorio i den trato pa ku ekstranheronan riba nos isla.
E temátika di migrante ta un tema ku ta tene e Ministerio di Hustisia okupá diariamente i kontinuamente ta hasiendo ehersisionan i ehekutando adaptashonnan pa asina fasilitá e prosesonan enkuanto migrantenan.
Derechonan humano i un trato honesto ta keda puntonan di salida di e maneho migratorio di Ministerio di Hustisia. Kòrsou no por habri frontera sin mas i duna tur persona ku ta deseá esaki akseso na nos país sin ku nan ta kumpli ku reglanan i leinan vigente. Minister di Hustisia ta enfatisá ku Kòrsou ta respetando derechonan humano di tur siudadano di nos país i tambe di esnan indokumentá. Ministerio di Hustisia lo deliberá riba e rapòrt internamente pa den futuro serkano por reakshoná riba e kontenido na parlamento.