Karta inkriminatorio di GIK pa gobièrnu i parlamento

Willemstad, 23 di febrüari 2023

 

Karta inkriminatorio di GIK pa gobièrnu i parlamento

 

Den un karta fechá 22 di febrüari 2023 abogado di GIK, yu di tera dr. Rutsel Martha, na nòmber di su kliente GIK ta hasi algun akusashon pisá i inkriminatorio kontra Promé Minister sr. Pisas i Minister di VVRP, sr. Cooper.

Di forma klá, dr. Marta ta informá, entre otro:

‘Komo parti di e desishon aki, Prome Minister i Charles Cooper a organisá un AVA pa duna e falta di rèspèt pa e posishon di e Hunta di Komisario un base hurídiko. E sobrá ta konosí i Ministerio Publiko lo dibulgá loke realmente a pasa i ken ta esnan responsabel pa e daño hasí na Kòrsou ku, konforme lei, sigur lo no skapa un sentensia i kastigu.

 

Pero ta importante pa remarká ku Hustisia ta solamente enkargá ku investigá e aspektonan kriminal di e asuntu. Durante henter e proseso pa skohe un operador, konsientemente a mina i violá diferente lei manera bestuursrecht, burgerlijkrecht i tambe konstitushon.’

 

E akusashonnan pisá aki no por keda kologá den laria!

 

Ta na Parlamento pa yama ku karakter di úrgensia un reunion den Komishon Sentral di Parlamento ku GIK, manera a yama ku CPR, pa GIK substansiá e akusashonnan, siguí pa un reunion ku Gobièrnu. Aki Parlamento por siguí e  model pa reunion ku e mes a kreá ora e la invitá CPR pa un reunion den Staten pa tende su banda. Ta importante pa pega tras di e reunion di Komishon Sentral aki, direktamente un Reunion Públiko ku Gobièrnu, pa Gobièrnu responsabilisá su mes.

 

Nos ta rekòrda Parlamento ku no por skondé tras di investigashon di Ministerio Publiko, paso e órgano aki ta investigá solamente e aspektonan kriminal ku ta kai bou lei penal.

GIK su akusashonnan ta, ku ademas di lei penal a kibra Lei di Gobernashon (bestuursrecht), lei sivil i pió ainda hasta nos Konstistushon!

Den otro palabra: nos estado di derecho ta keda miná i ta na peliger!

 

Pa e parti penal di e kaso, palabra ta na Ministerio Públiko pa traha rapido riba e  kehonan entregá.

 

Responsabilisashon di gobernashon, pa lei estatal mester tuma lugá den Parlamento! PUNTO!

 

Nos ta spera ku nos sistema parlamentario ta funshoná i ku awe mes e petishonnan pa reunion ta sali di tur partido representá den parlamento. Trabou di 3000 hende ta koré peliger, i esaki ta eksihí un aktuashon awe mes.