Proposishon pa instalá grupo di trabou pa atendé ku tres proyekto di pelotero nan pendiente

 

Na: Presidente di Parlamento di Kòrsou

Sra. Ch. America-Francisca

Wilhelminaplein 4

Presente

 

Willemstad, 24 febrüari 2023

 

Tópiko: proposishon pa instalá grupo di trabou pa atendé ku tres proyekto di pelotero nan pendiente

 

 

Honorabel sra. America-Francisca,

Señora presidente, pa medio di e karta aki suskrito ke hasi uso di artíkulo 96 di Reglamentu di Òrdu i ta pidi enkaresidamente pa bo persona por dirigí e karta aki ku e tópiko; ‘proposishon pa instalá grupo di trabou pa atendé ku tres proyekto di pelotero nan pendiente’, na Minister OWCS, sr. van Heydoorn.

 

Atentamente,

 

 

 

Steven Croes

Frakshon di PAR

 

 

 

 

 

Na: Minister di Enseñansa, Siensia, Kultura i Deporte

Sr. C. van Heydoorn

Schouwburgweg 24-26

Presente

 

Na: Minister di Tráfiko, Transporte i Planifikashon Urbano

Sr. Ing. Charles Cooper

Seru di Ararat, Parsela C

Presente

 

Willemstad, 24 febrüari 2023

 

 

Honorabel Sr. van Heydoorn i Sr. Cooper,

 

Na groundbreaking siman pasa di Dili Leeds Foundation suskrito a keda kontentu di tende ora Minister Cooper a bisa ku gabinete Pisas ta haña importante pa mas pelotero profeshonal invertí bek den deporte na Kòrsou i ku gabinete Pisas ke yuda ku esaki.

Pa pone akshon tras di e palabranan aki di Sr. Cooper, suskrito ke proponé lo siguiente pa asina gobièrnu yuda fasilitá tres proyekto deportivo importante ku na e momento nan aki ya tin basta tempu “on hold” pa un òf otro motibu:

 

Instalá un grupo di trabou ku ta konsistí di: Fundashon Desaroyo Deportivo Kòrsou, Domeinbeheer i departamento di Kultura i Deporte di Ministerio di OWCS, pa asina nan tres yega na un solushon pa kada un di e tres proyekto nan aki i asina evitá ku e pelotero nan aki ta rabia i para ku nan proyekto kual Kòrsou hustamente mester di dje aworakí. E tres proyekto nan ta:

 

1. Hensley Meulens ke desaroyá un vèlt di beisbòl optimalisá na Sta. Rosa ken ta wardando basta tempu kaba riba su bouwvergunning.

 

 

 

 

2. Coco Balentien ke desaroyá un vèlt di (mini) futbòl na Groot Kwartier. Sr. Balentien ta wardando mas ku 1 aña i mei pa rektifiká e tereno, komo Sr. Balentien a pidi pa bin na remarke pa un tereno banda di krèsh Bai Bini. A firma un MUO, pero despues a bin deskubrí ku na lugá di pone e tereno ku e la pidi, a pone e tereno parti pabou di Capriles kliniek. Tambe Sr. Balentien ta puntra si gobièrnu por yuda e proyekto dor di pone lus na e vèlt.

 

3. E kaso di Fundashon di Sr. Andruw Jones pa ku e vèlt na Muizenberg. Minister van Heydoorn a bisa den pasado den prensa ku ta warda riba Sr. Andruw Jones te ku fin di desèmber 2022, despues Sr. Van Heydoorn a bisa den reunion di Parlamento ku Andruw Jones tabata na Kòrsou den desèmber i a aserk’é pa un sita, pero ku e sita no por a bai dor paso Minister Cooper no tabata por na e dia/orario stipulá i tambe tabata tin un problema ku a mira mensahe di lat di e representante di e fundashon i asina no a logra reuní mas ku e fundashon di Sr. Andruw Jones. Finalmente a bisa ku pa yanüari 2023 lo a atendé esaki.

 

 

Suskrito ta proponé pa den tres luna e tres instansia nan di gobièrnu menshoná, bini ku un solushon pa kada un di e kasonan aki ku tin hopi tempu wanta pero ku si ta hopi importante pa pueblo di Kòrsou (i pues tambe pa gabinete Pisas).

Ta proponé pa e tim di trabou aki raportá kada luna na Minister di OWCS, Minister VVRP i Parlamento di Kòrsou.

 

 

Atentamente,

 

 

Steven Croes

Miembro di Parlamento,  Frakshon di PAR

 

 

CC:       Lizette Sambo-Velder, Sector Directeur Cultuur en Sport na Ministereo di OWCS

Vergilly Winklar, Directeur Fundashon Desaroyo Deportivo Kòrsou

Jairo Martis, Directeur Domeinbeheer