PROMÉ MINISTER GILMAR PISAS TA INFORMÁ KU A RISIBÍ REAKSHON OFISIAL DI PARTI VENEZUELA PA KU E PROSESO PA HABRI FRONTERA MARÍTIMO

Promé Minister Gilmar Pisas TA INFORMÁ KU A RISIBÍ REAKSHON OFISIAL DI PARTI VENEZUELA PA KU E PROSESO PA HABRI FRONTERA MARÍTIMO.

 

Willemstad – Promé Minister sr. Gilmar Pisas ta informá ku a risibí reakshon ofisial di parti di Venezuela pa ku habrimentu gradual di frontera marítimo entre Venezuela i Kòrsou.

 

Despues ku di parti di Reino Hulandes a manda un “Nota Verbal” pa Venezuela den kual a hasi menshon di tur e detayenan nesesario pa por yega na e reapertura  gradual di e parti marítimo i aéreo, a risibí un reakshon ofisial (Nota Verbal) di parti Venezuela dia 2 di mart 2023.

 

Den esaki Venezuela a indiká ku e  “Instituto Nacional de Espacios Acuaticos” (INEA) ta hasi petishon pa tene reunionnan virtual mas pronto ku ta posibel ku e outoridatnan marítimo di Aruba, Boneiru i Kòrsou, ku e fin pa kumpli ku e detayenan tékniko pa ku e reapertura gradual di e parti marítimo, basa riba e fechanan ku a keda menshoná pa kada isla.

 

Di parti di Gobièrnu di Kòrsou lo sigui duna informashon riba e proseso aki na nos komunidat.