Gobièrnu di kòrsou a hasi un bishita huntu ku representante di piskadonan i Defensa na wacawa

 

 

Willemstad – Gobièrnu di Kòrsou a hasi un bishita huntu ku representante di Piskadonan i Defensa na Wacawa dia 5 di mart 2023.

 

Di parti di Gobiernu di Kòrsou tabatin presente Promé Minister sr. Gilmar Pisas, Minister di Salubridat, Medio Ambiente i Naturalesa sra. Dorothy Pietersz-Janga, Minister di Hustisia sr. Shalten Hato, Minister di Tráfiko, Transporte i Planifikashon Urbano sr. Charles Cooper huntu ku ekspertonan di e Ministerio di GMN, VVRP, AZ i Carmabi.

 

Di parti di Defensa tabata presente Komandante sr. Frank Boots (Commandant Zeemacht in het Caribisch Gebied) huntu ku algun miembro di su staf i e tim ku ta atendé ku e ehersisionan ku ta tuma lugá na Wacawa.

 

Di parti di e Piskadonan tabatin presente representantenan di e Federashon Koperativanan Uní di Produkshon, Fundashon Viba, algun Piskadonan di Wacawa i nan konsehero.

 

For di 1 di mart 2022 ku Gobièrnu di Kòrsou a sinta pa promé biaha ku e gruponan aki, i ku a lanta un grupo di trabou dia 9 di mart 2022, a i lo sigui ku diferente reunionnan den e grupo di trabou aki.

E puntonan ku mas ta pone atenshon riba dje durante kada reunion ta:

1. E kantidat di dia ku Defensa/Marina Real ta train na Wacawa;
2. Seguridat pa ku e Piskadonan su bida;
3. Oportunidat pa e Piskadonan por keda piska den e área di Wacawa;
4. Investigashonnan ku mester bini pa midi e impakto riba nos Medio Ambiente;
5. Pèrmitnan ku ta nesesario pa hasi sierto práktikanan na Wacawa.

 

Por menshoná ku ya a yega na diferente palabrashonnan ku Defensa ku ta yuda pa fasilitá e parti di piskamentu na Wacawa. Un otro palabrashon tabata tambe pa hasi un bishita na Wacawa kaminda por a tuma nota di loke ta keda hasi na Wacawa i hasi e preguntanan ku ta nesesario pa por sigui traha riba solushonnan duradero ku lo benefisiá e Piskadonan di Wacawa i Defensa den futuro.

 

E dia a kana hopi bon i tur hende tabata satisfecho ku a organisá e enkuentro aki na Wacawa.