TREMENDO FUTBÒL DI BASILON EN KONEKSHON DI DIA INTERNASHONAL DI HENDE MUHÉ!

Dia 8 di mart próksimo ta dia internashonal di hende muhé, en konekshon ku e dia aki FFK lo selebrá esaki na un manera úniko!

Dia 8 di mart den Stadion Rignaal ‘Jean’ Francisca lo tin un partido di basilon entre e trahadónan di FFK i miembronan femenino di direktiva kontra e ekipo kampion di Kampionato Femenino 21-22; Jong Holland kategoria U-15.

Mas despues nos selekshonnan femenino kategoria U-20 i Senior lo enfrentá otro durante un partido di fogeo komo preparashon pa nan kompromisonan internashonal ku lo tin e aña aki.

Gran parti di e trahadónan di ofisina di FFK ta konsistí di sernan femenino ku ta traha duru pa progreso i adelanto di futbòl en general. Huntu ku nos miembronan di direktiva ku tambe ta para pa e desaroyo di futòl femenino i mas ku klaro nos hungadónan di selekshon ku ta kla pa saka nos kara durante tur torneo internashonal, e anochi aki ta primintí di bira unu sumamente plasentero.

 

P’esei e invitashon ta bai na pueblo di Kòrsou i spesialmente na tur hende muhé pa bin selebrá dia internashonal di hende muhé huntu ku nos i disfrutá di algun tremendo partido!

 

Semper bo kier a mira kiko tur e trahadónan i miembronan femenino di direktiva di FFK tin aden riba vèlt? Awèl, ata bo chèns!

Nos ta topa dia 8 di mart den Stadion Rignaal ‘Jean’ Francisca pa 7’or di anochi…tur partido ta grátis!