Partisipashon di Minister di GMN na Our Oceans Conference na Panamá      

Willemstad – Dia 1 pa 3 di mart 2023 último Minister di Salubridat, Medio Ambiente i Naturalesa, drs. Dorothy Pietersz– Janga a partisipá na Our Oceans Conference na Panamá. E tema di e aña aki ta “Our Ocean, Our Connection conference” – Nos Oséano, Nos Konekshon. E konferensia Our Oceans tin komo meta pa enfatisá un di e desafionan global mas kompliká ku nos ta enfrentando: garantisá pa nos oséano ta salú i produktivo. E meta prinsipal di e konferensia ta pa salbaguardiá nos rekursonan marino pa nos futuro generashon. Den e kuadro aki nos oséano mester ta sano i produktivo.

 

E enfoké di e konferensia ta riba seis área: peska artesenal sostenibel, polushon di oseano, efektonan di kambio di klima riba oséano, áreanan marítimo protehá, ekonomía blou i seguridat marítimo.

 

Durante e konferensia, Minister Pietersz- Janga a hasi uzo di oportunidat pa reuní ku representantenan regional, i tambe organisashonnan no-gubernamental (“NGO’s”).

Kolaborashon regional i internashonal ta na bista. Asina a reuní por ehèmpel ku representantenan di Aruba i Inglatera.

 

E konferensia ta esensial pa Kòrsou den kuadro di e implementashon di “Offshore Marine Santuary”. Ministerio di GMN a tuma pasonan konkreto pa protehá 30% di awanan di Kòrsou, fortalesé e sektor di peska lokal i promové edukashon marítimo i konsientisashon.

 

Kórsou tin sinku (5) área designá komo Ramsar i ekosistemanan relashoná ku Oséano di kual aproksimadamente 10% ta protehá. Kórsou ta avansando tambe pa krea un di e reservanan marino mas grandi di Karibe ku lo ta un área di 7500 kilometro kuadrá, implementa seis (6) zona adishonal pa reprodukshon di piskánan, mehorá e protekshon i maneho di nos ekosistema di koralnan i proponé pasonan konkreto pa hasi nos kosta mas resistente pa kambio klimátiko.

 

Den e kuadro aki e konferensia tin vários punto ku ta konektá ku e maneho sostenibel di oséanonan aktual di Kòrsou. Di e forma aki protekshon di nos oséano ta importante pa disponibildat di rekursonan natural pa nos futuro generashon, minimalisá efektonan di kambio klimátiko riba nos oséano, manehá peska lokal di un forma sostenibel i pa konservá e biodiversidat oseaníko.

1 Riba potrèt: Delegashon di Kòrsou na inougurashon di Our Oceans Conference
2023. Drpd; Ciaretta Profas di departamentu di maneho, kolaboradó di minister
Aubry Janga, Minster Dorothy Pietersz– Janga i direktor di sektor di Naturalesa i
Medio Ambiente Gabriel Murray.
2 Riba potrèt: Delegashon di Reino ku a partisipá na e konferensia.
3 Riba potrèt: Minster Dorothy Pietersz– Janga i Minister Arends di Aruba huntu ku
Presidente di Mission Blue / The Sylvia Earle Alliance dr. Sylvia Earle i demas
ministernan di Karibe i Sur Amerika ku tabata presente.