WORSKHOP SENTRO DI SUIDAT KOMO ‘OUTSTANDING UNIVERSAL VALUE’

Willemstad – Resientemente, ekspertonan di Ministerio di Tráfiko, Transporte i Planifikashon Urbano (VVRP) huntu ku Stichting Monumentenfonds, Stichting Monumentenzorg, Universidat di Kòrsou su fakultat tèkniko, ekspertonan for di Hulanda, i mas ‘stakeholders’ ku ta traha den Sentro di Suidat i ku ta diseña konstrukshonnan den Sentro di Suidat, a topa durante un ‘workshop’ pa traha riba 2 aspekto importante.

 

‘Outstanding Universal Value’

E promé aspekto ta pa yega na mihó interpretashon di kiko e aspekto konosí komo ‘Outstanding Universal Value’ ta enserá. Esaki ta e faktor ku UNESCO ta usa pa determiná kiko ta bira un Patrimonio Mundial. Tempu ku Kòrsou a entregá su petishon pa Willemstad keda rekonosí komo Patrimonio Mundial na aña 1997, a duna splikashon di esaki. Awor despues di 25 aña, ta tempu pa huntu yega na un mihó deskripshon di Kòrsou su ‘Outstanding Universal Value’ komo Patrimonio Mundial.

 

Artíkulo 4 di EOP

E di dos aspekto ta pa yega na un mihó kuadro pa duna por konseho riba proyektonan den Sentro di Siudat, konforme Kòrsou su plan di desaroyo (EOP), pa ta mas spesifiko artíkulo 4 di EOP. E regulashonnan aki lo por bira muchu mas koherente i transparente. Arkitéktonan i ekspertonan lo por komprondé aun mas mihó kiko e ‘Outstanding Universal Value’ ta enserá spesifikamente.

 

Durante di e ‘workshop’, e grupo a identifiká tur aspekto ku ta hasi nos sentro di siudat úniko, i tambe na unda mester duna atenshon. Interesante tabata pa a wak e interakshon entre studiante di UoC i ekspertonan. Esaki tabata sigur un balor agregá pa e ‘workshop’. Tambe a identifiká muchu mas eksakto kua ta e diferente áreanan den nos Sentro di Siudat. 

 

E resultadonan lo keda inkorporá den un dokumento titulá ‘kernwaardenonderzoek’. Esaki lo bira e base pa bai traha riba un kuadro di maneho.

 

Mirando e interes i entusiasmo, lo bai studia e posibilidat pa un di dos ‘workshop’, sea aki na Kòrsou òf na Hulanda. E produktonan final lo por duna, tantu Minister Charles Cooper i esnan ku ke desaroyá den nos Sentro di Suidat, un kuadro mas transparente pa ehekutá proyektonan. Tambe Kòrsou lo kumpli ku e nesesidat di UNESCO pa nos tin mihó atenshon i denominashon di e balornan di Kòrsou komo patrimonio mundial

 

Tur esaki ta resultado konkreto di e bishita di trabou ku Minister Charles Cooper a hasi na aña 2022 na Hulanda durante kual el a topa ku Sektretario di Estado Sra. Uslu di Kultura i Media, ku a pone fondonan disponibel pa e trayekto aki.