Kooperativismo ta uni un komunidat i ta promové desaroyo sosial-ekonómiko TPK ta trahando riba e lei pa Kooperativa
Parlamento a rechasá moshon di TPK, pero mester sigui asentuá e importansha di kooperativismo
Parlamentario pa frakshon di Trabou pa Kòrsou, sr. Rennox Calmes, ta kontentu ku riba 13 di mart 2023 porfin su petishon pa ku un reunion den kuadro di kooperativismo na Kòrsou a wòrdu honrá. E meta di e reunion aki tabata pa traha riba konsientisashon di importansha di kooperativa pa Kòrsou. Na desèmber 2022 Trabou pa Kòrsou a presentá un moshon ku ta úrgi gobièrnu entre otro pa traha riba un Lei madre den kuadro di kooperativa aki na Kòrsou. Nashonnan Uní ta konfirmá ku kooperativa tin hopi efekto positivo riba un sosiedat riba tereno sosial-ekonómiko, manera baha kosto di bida, debí ku gastunan ta baha drástikamente na momentu kompartí gastu di kompra, krea entrada, promové trabou, produkshon di kuminda, teniendo na kuenta ku tin hopi skarsedat di kuminda rònt mundu, baha desempleo, garantisa ku tin produkto, bon servisio èts. No opstante ku Trabou pa Kòrsou a asentuá e importansha di kooperativa i su efekto riba sosiedat i ekonomia di Kòrsou, e moshon no a haña sufisiente sostén na dèmber 2022 durante tratamentu di prosupuesto 2023.
Na 2009/2010 a kuminsa traha riba un lei pa solamente kooperativanan di krédito haña eksonerashon riba pago di impuesto di ganashi, ku e pensamentu ku kooperativanan mester invertí den formashon di nan hendenan ku e sèn ku nan ta sobra. Akinan a lubida riba e otro kooperativanan. Despues di aki, pa años kaba gobièrnunan di turno ta papia riba kooperativa, pero te ahinda no tin nada konkreto pa lokual ta un Lei di kooperativa. Na 2020 parlamentario sr. Calmes a manda e Lei bèk aden pa parlamento, kaminda a pidi eksonerashon di 25% pa kooperativanan di krédito, debí ku formashon ta nesesario pa konosementu i progreso di bo pais. Raad van Advies a konsehá pa inklui e otro kooperativanan tambe. Entre otro kooperativa di piska, agrikultura, èts.
Aktualmente Trabou pa Kòrsou, ta forma parti di e komishon di agrikultura, krio di bestia i piska di Parlatino. E komishon ta atendiendo un Lei madre di kooperativa ku otro paisnan por hasi uso di dje. Trabou pa Kòrsou ta úrgi gobièrnu i parlamentu di Kòrsou pa hasi uso di lasonan kreá den Parlatino pa traha riba un lei pa kooperativa pa Kòrsou. Den kuadro di esaki Trabou pa Kòrsou a kuminsa traha riba e lei pa kooperativa, hasiendo uso die lei di Canada. No opstante di esaki, sr. Calmes ta di opinion ku kooperativa no mester bira algu polítiko, pero algu pa pais.
Den kuadro di esaki, sr. Calmes durante reunion a puntra gobiernu entre otro: kon gobièrnu ta mira kooperativa den su totalidat? Kiko tur a wòrdu hasí te ku aworaki riba e área di kooperativa? Si tin un plan duradero riba e parti fiskal i ekonómiko? Kuantu kupo di trabou kooperativanan por krea aki na Kòrsou? Gobiernu a proyekta esaki kaba? Kuantu kupo di trabou a wòrdu kreá dor di kooperativa i posibel akuerdonan ku awòrdu firmá? Tambe Calmes a pidi tur, pero tur dokumentu ku gobiernunan di turno a hasi ultimo 12 aña nan relashona ku kooperativa.