KALIDAT I DESAROYONAN NOBO DI NOS AWA I SU KALIDAT ATENDE DEN SIMPOSIO RIBA DIA DI AWA
Willemstad 20 di Mart 2023 – Nashonnan Uní, na okashon di Dia Internashonal di Awa riba 22 di Mart benidero, ta suprayá ku tur aspekto di nos sobrebibensha na mundu ta dependé di akseso na awa.
Tur organismo, e ser humano, tur animal, nos medio-ambiente, e sistema ekológiko, nos klima, produkshon di kuminda, desaroyonan sosio-ekonómiko i hopi mas; nesesidat fundamental di túr ta mará na awa. Pa e motibu aki Aqualectra, komo nos kompania ku ta produsí i distribuí awa pa komunidat di Kòrsou, ta organisá un simposio riba djarason 22 di Mart kual ta ‘Dia Internashonal di Awa’ ku ta hiba e tópiko “Nos Awa, e awa mas puru na mundu – esaki realmente t’asina?”. Awa ta un asuntu di nos tur, pues Aqualectra ta invitá un i tur pa tuma parti na e simposio aki for di mitar di 7 di anochi den ouditorio di Universidat di Kòrsou. E simposio ta habrí pa públiko i ta grátis
Tópikonan interesante presentá ku espasio pa diskutí i interkambiá pensamentu
Durante e simposio oradornan lo duna presentashon tokante produkshon i distribushon di awa na Kòrsou i ki ta tur e pasonan i akshonnan ku mester tuma diariamente pa por garantisá e kalidat haltu di awa ku nos a kustumbrá. Durante e simposio lo trata tambe desaroyonan nobo relatá na produkshon di Second Grade Water na Kòrsou. Aqualectra i Aqualectra Multi-Utility (AMU) huntu a disidí pa krea un dimenshon nobo den produkshon i distribushon di awa na Kòrsou. En bes di usa e awa di kalidat haltu pa ophetivonan sekundario manera awa pa flush toilèt, laba outo, pisina òf pa mantené hardin, ta desaroyando un ret pa awa sekundario. Di e forma aki ta logra dal pasonan importante den e esfuersonan pa kontribuí na un forma signifikativo pa Kòrsou dor di hasi bon uso di su rekursonan limitá na un forma duradero.
E produkshon di ‘Second Grade Water’ ta rekerí menos energia pa produkshon, menos kímiko i menos hende pa realisá e labor, kual tur huntu ta resultá den gastunan di produkshon hopi mas abou. Den esensia, mas barata i hopi mas duradero pa esnan ku ta usa e awa aki pa propósitonan sekundario.
Nos awa i su historia di produkshon i destribushon
Un bista bek den historia ta mustra ku nos na Kòrsou a yega hopi leu for di e tempunan aya kaminda hende mester a saka awa for di den tera ku mulina i transportá tanki di awa di un lugá pa otro. Alrededor di 1893 Leonard Smith a bin ku e idea pa desaroyá diferente sentro di awa ku kranchi kaminda habitantenan por a yena na bleki grandi òf hèmber ku awa. Despues ku awa a keda rekonosé komo un derechi humano, Richard Beaujon ku tabata direktor di Landswatervoorzieningen Curaçao entre 1928 pa 1949, a bini ku e gran plan pa desaroyá distribushon di awa na Kòrsou. Asina a lanta un planta di awa na Zakitó. Ta momentunan kardinal ku a resultá ku awendia nos por habri kranchi i disfrutá di awa puru i kristalino. Pa sigur 93 aña Aqualectra ta produsí awa puru pa komunidat, pa medio di destilashon di awa di laman últimamente via e sistema di ‘Reverse Osmosis’. Den e ‘gedenkboek Landswatervoorziening Nederlandse Antillen’ Dr. Da Costa Gomez, komo Presidente di Gabinete i Minister di Watervoorziening pa Antias, a bisa tokante un sitá di Tau-Te-Ching ku “..habitantenan di nos islanan den Karibe po papia di eksperensha grandi riba bondat di awa, kende naturalesaa faboresé ta poko ku es ‘awa’ku ta probechoso na dies mil kos, ku ta e bien mas probechoso di mundu”. E mensahe tokante e importansha di awa ta keda mes kos atraves di e añanan.
