‘COMMUNITY CENTER’ NA MON REPOS PRONTO UN REALIDAT
MINISTERIO KONSERNÍ TRÁFIKO, TRANSPORTE I PLANIFIKASHON URBANO
PUBLIKÁ RIBA 23 MART 2023
Willemstad – Pronto e área di Mon Repos lo keda dòrná ku un bunita ‘community center’. Riba djaweps 23 di mart, Minister Cooper huntu ku Servisio pa Planifikashon Urbano (ROP) a hasi entrega di e pèrmit di konstrukshon na Pastor Eugene Huybregts pa e konstrukshon aki.
E sentro lo konta ku un teatro pa aktividatnan sosial i spiritual, salanan ku ta disponibel pa hür, tambe un skol pa muchanan di kual mayoria ta muchanan di menos rekurso. E parti aki di skol ta bira posibel atraves di spònsernan ku ta kontribuí pa kubri e gastunan di e muchanan. Tambe lo tin un sentro di ‘bowling’, un restorant, espasio pa duna lès, i un espasio pa muchanan hunga.
Tur esaki lo ta un invershon total di 4 mion florin den e promé fase pa despues sigui ku fase dos, ku tambe lo ta un promedio di 4 mion.
Minister Cooper ta deseá Pastor Huybregts i Pastora Solange Huybregts-Henriquez i Iglesia Alpha i Omega tur klase di éksito ku e proyekto aki.
