DIA INTERNASHONAL DI TEATRO 27 DI MART 2023

 

Riba 27 di mart próksimo – Dia Internashonal pa Teatro – Teatro KadaKen ta presentá e obra teatral ‘E Hòmber ku a bira Kachó’ pa públiko general den Teatro Aula Habaai.

 

“I ami kiko mi por bisa? Ami mes no sa mas ku mi ta un hòmber òf un kachó. I mi ta kere ku ningun hende al final por bisa esei tampoko. Pasó tur kos a kuminsá mashá gewon.”

 

E teksto di e obra aki ta original di e Argentino Osvaldo Dragún. Hopi aña despues direktor di esena Milushka Birge ta kombertí e obra akí pa e konteksto di Kòrsou. E tema dehumanisashon tabata e tema prinsipal di eskritor Dragún. E temanan ku Birge ta atendé den e vershon pa Kòrsou ta inseguridat rondó di trabou i eksplotashon.

 

Teatro KadaKen a estrená e obra aki den Kaya Kaya Party, Kurá Edition 2022. Aktornan ta Eduard Reineta, Crisèn Schorea, Angelo Wilson, Diana Minguel de Mey i Norma Cova. Despues nos a hasi un petishon serka Prins Bernhard Cultuurfonds Caribisch Gebied pa sostené 5 presentashon mas. Nos lo presentá 3 biaha pa skol, un biaha pa grandinan di Birgen di Rosario i bisindario i un biaha pa públiko general. Reda Sosial tambe ta yuda hasi e presentashon pa e grandinan posibel.

 

Djaluna 27 di mart Crisèn i su banda 8.40 lo presentá promé ku e obra i alabes aksentuá algun esena ku muzik. Vesuhely Americaan lo interpretá un poesia ku el a skibi spesialmente pa e presentashonnan aki.

 

Milushka Birge ta invitá bo pa bishitá Teatro Aula Habaai pa wak e obra ‘E Hòmber ku a bira Kachó’: ‘Laga nos topa i reta nos mes pa pensa kritíko i reflehá riba kontenido di e obra akí. Esaki por yuda amplia nos vishon di mundu.’

 

E presentashon riba di 27 di mart ta di 19:30 pa 21:00or na balor di NAf. 27.50. Karchi ta optenibel na Mensings Caminada. Pa mas informashon por mail teatrokadaken@gmail.com òf manda un WhatsApp pa Lou Nisbet number +599 9 672 45 80.

 

Teatro AULA HABAAI ta parti di edifisio HABAAI kaminda nos grandinan ta biba, pero tin su propio entrada.