Gobièrnu di Kòrsou ta firma akuerdo di maneho ku Curaçao Zoo

Gobièrnu di Kòrsou ta firma akuerdo di maneho ku Curaçao Zoo

 

Willemstad – Un Curaçao Zoo moderno, úniko, grandi, bunita, i yená ku animalnan eksótiko. Esei ta e meta final ku kua awe djaweps 8 di òktober 2020, Minister Jesus-Leito di Ministerio di Tráfiko, Transporte i Planifikashon Urbano (VVRP) a firma e akuerdo di maneho ‘beheersovereenkomst’ ku Curaçao Zoo. Atraves di e akuerdo aki, Gobièrnu ta formalisá e echo ku Curaçao Zoo ta manehá 9 hèktar di tereno di Gobièrnu. Tambe ta regla mantenshon, eksplotashon i aksesibilidat di henter e área. 

 

Fundashon Parke Tropikal ta hasi uzo di parti di e terenonan aki ya pa 20 aña. Na 2018 a kuminsá e proseso pa konkretisá e uzo den forma di un akuerdo di maneho. Despues di deliberashonnan ekstenso entre Gobièrnu i e fundashon awe a yega e momentu di konkretisashon dor di un seremonia di firmamentu.

E akuerdo aki lo ta bálido pa 5 aña i por wòrdu renobá kada 5 aña, despues di un evaluashon eksitoso. Mirando ku Curaçao Zoo ke sigui desaroyá henter e área, e mester tin e parti di tereno bon reglá pa por sigui kana e proseso di desaroyo i di pèrmitnan nesesario. 

 

Den e akuerdo a hasi diferente palabrashon ku otro, kaminda a indiká reglanan di Gobièrnu ku Curaçao Zoo mester tene nan mes na dje. Tambe tin stipulá kua ta e derechonan ku Curaçao Zoo tin. Huntu ku esakinan e akuerdo ta definié kua parti di e tereno eksakto Curaçao Zoo ta manehá i te na unda nan por desaroyá. 

 

Curaçao Zoo ta risibí supsidio di Gobièrnu pa maneho di e parke. Atraves di añanan, mirando e situashon finansiero prekario di pais, esaki a baha. Ku e akuerdo aki, Curaçao Zoo por aserká invershonistanan pa asina sigui desaroyá e parke. 

 

Pa Minister Jesus-Leito e firmamentu di e akuerdo aki ta  algu spesial . E parke aki tin un balor sentimental pa hopi suidadano di nos pais ku a biba momentunan agradabel i inolvidabel na momentu ku a  hasi bishita na e parke aki sea ku famia of skol. Minister Jesus-Leito ta spera ku pronto Curaçao Zoo ta keda desaroya den un dje parkenan tropikal di mas bunita den nos área .