“Un nubia scur riba bishita di Rey” FRACCION DI MEP TA PIDI ACLARACION, RESPONSABILIDAD Y ACCION
“Un nubia scur riba bishita di Rey”
FRACCION DI MEP TA PIDI ACLARACION, RESPONSABILIDAD Y ACCION
ORANJESTAD — Recientemente Fraccion di MEP a ricibi un carta anonimo cu ta contene acusacionnan serio tocante posibel irregularidadnan durante bishita di Rey Willem Alexander na Maart 2026.
Segun e informacion ricibi, un consehero den entorno directo di Minister President lo a haci mal uso di su posicion pa beneficio personal y/of financiero den contexto di actividadnan relaciona cu e bishita oficial. Ademas, e carta ta alega cu Minister President lo tabata informa di antemano, pero cu no a tuma accion pa evita esaki.
Pa motibo di gravedad di e alegacionnan, y specialmente di e silencio di parti di gobierno, Fraccion di MEP a tuma accion. Siman pasa fraccion a manda un peticion bon argumenta, pidiendo pa un reunion publico cu e Minister President. E siman aki e fraccion a manda preguntanan formal na minister president, buscando clarificacion tocante su mesun rol den e asunto, su conocemento previo, accionnan tuma, y tambe e rol di conseheronan den su entorno.
Contesta riba e preguntanan aki ta importante pa restablece confiansa publico. Pueblo tin derecho di sa si e Minister President a haya señalnan prome y kico Gobierno a haci cu e informacion. Tambe pueblo tin derecho di sa si procedimentonan y regla di integridad a wordo cumpli, y ken tin cu carga e responsabilidad politico y administrativo den e caso aki.
Integridad den gobernacion no ta un opcion; e ta un obligacion. Ora tin duda, mester bin transparencia. Ora tin señalnan, mester bin accion.
PETICION PA INVESTIGACION DI CAD
Ademas, e fraccion a entrega e carta anonimo na Presidente di Parlamento cu peticion formal pa pidi na Centrale Accountantsdienst (CAD) revisa e informacion y determina si tin base pa habri un investigacion oficial. Mescos cu a wordo haci algun aña pasa den e caso di Arubahuis.
E peticion ta pa un instancia independiente evalua si tabatin irregularidadnan financiero, falta di control of posibel conflicto di interes.
Aruba merece un gobierno cu ta traha cu integridad, transparencia y responsabilidad. Confiansa di pueblo no por wordo pidi; e mester wordo gana tur dia cu accion, cu berdad y cu liderasgo.
Nos no por permiti cu silencio di e Minister President lo substitui su responsabilidad, ni tampoco cu duda keda sin contesta. Y nos no por laga integridad bira opcion den gobernacion.
