Konsepto di lei pa modernisá lei di notario a keda entregá personalmente – un paso importante den e lucha kontra tempu largu di spera

 

E konsepto di lei pa kambia e Landsverordening op het Notarisambt a keda entregá personalmente na Minister di Asuntunan General, señor Gilmar Pisas, pa Minister di

Hustisia Shalten Hato djárason 13 di mei 2026, teniendo na kuenta e urgensia i e interes sosial. Minister Hato a dal e paso aki pa sigui ku e proseso legislativo di un manera mas lihé i ku e prioridat nesesario. Awor e konsepto di lei lo ser mandá pa konseho na Departamento di Legislashon i Asuntunan Hurídiko (WJZ), ku ta kai bou di Ministerio di Asuntunan General.

Un di e motibunan pa e kambio di lei aki ta e señalnan persistente for di komunidat tokante e tempu largu di espera na notario. E tempu di spera aki tin konsekuensianan direktamente pa siudadanonan i kompanianan, i ta afektá seguridat hurídiko i e progreso di transakshonnan ekonómiko i hurídiko.

 

E propuesta di lei ta kontené medidanan konkreto pa atendé e problemátika aki di manera struktural. Entre otro, ta enfoká riba:

• Oumentá e kapasidat den notario(nan), entre otro dor di oumentá e kantidat di notarionan;
• Introdukshon di e “toegevoegd notaris”, ku lo hasi posibel pa kandidaat-notarisnan eksperensiá hasi trabounan independiente bou di responsabilidat di un notario;
• Krea un struktura profeshonal kla i den fase, dirigí riba entrada duradero i kresementu den e profeshon.

E medidanan aki ta kontribuí na un organisashon di notario mas fleksibel i prepará pa futuro, ku komo meta pa mehorá e servisio i redusí e tempu di spera.

Promé ku yega na e fase aki, a tene un ronda di konsulta ku stakeholdernan relevante for di práktika, kual ta inkluí representante di notario i sektornan relevante. E “insightnan”i ‘feedback’ risibí durante e konsultanan aki a wòrdu prosesá, unda tabata posibel, den e konsepto di lei presentá. Asina a buska pa e propuesta konektá di e mihó manera ku e práktika i e berdadero punto di atenshon pa notaris.

E desishon pa entregá e konsepto di lei personalmente ta motivá e importansia di enfatisá e progreso di e trayekto aki. Teniendo na kuenta e impakto riba komunidat i ekonomia, ta importante ku e pasonan nesesario ser tuma ku determinashon i sin retraso. Ku e kontinuashon di e trayekto aki, ta dal un paso importante den direkshon di un notario mas aksesibel, efisiente i ku ta funshoná mihó pa Kòrsou.