Konekshonnan nobo pa alsa aksesibilidat di Rif

Konekshonnan nobo pa alsa aksesibilidat di Rif

Geplaatst op 12 November 2020 dor di Ministerio Tráfiko, Transporte i Planifikashon Urbano

WILLEMSTAD – Dia 12 di novèmber 2020 Minister Jesus-Leito huntu ku Servisio pa Obra Públiko (OW) i kontratista CWM a inisiá trabounan di konstrukshon di dos kaminda den área di Rif. Ta kuminsá ku konstrukshon di e konekshon ostwèst, esta na entrada di SVB bai direkshon wèst, i pasa banda di e tereno Courtyard Marriot. Meta di esaki ta pa alsa aksesibilidat di e área. Despues ta sigui ku konekshon nortsùit, esta di Megapir Tula pa e rotònde na Hamelbergweg / Pater Euwensweg.

Desaroyonan den área di Rif pa yega na un transformashon total, ta kanando. Programa Rif ta konsistí di diferente proyekto, entre nan esnan infrastruktural. Despues ku a habri e kanal pa awa di laman por drenta den e parke di palu di Mangel 1, ta bai kuminsá awor ku konstrukshon di e diferente kayanan.

E trabounan total lo tin un durashon di mas o ménos 6 luna. Ta bai traha e konekshonnan aki simultaniamente, loke por resultá den un periodo di ehekushon mas kòrtiku. Na tur momentu, pero sigur ora ku e kontratista bai ku vakashon den desèmber, e trabounan lo ta di tal sistema ku tur negoshi òf organisashon den e área ta keda aksesibel.

Durante di e trabounan lo por tin molèster di stòf, zonidu i tambe e lugánan di stashonamentu di outo lo bira limitá.

E trabounan lo ta na enkargo di e kontratista Curaçaose Wegenbouw Maatschappij (CWM). Total e proyektonan akí lo ta un invershon di mas o ménos 5 mion florin. Esaki sigur lo ta un empuhe ekonómiko grandi ku lo yuda trahadónan yega na nan pan di kada dia den tempu difísil. Programa Rif den su totalidat ta un invershon ekonómiko di 26 mion den transkurso di mas aña.

Na momentu ku e trabounan di konstrukshon ta bai kuminsá lo tin bòrchinan di indikashon i desviashon. Ta hasi un apelashon na tur hende pa tene kuenta ku esaki i ta gradisí di antemano pa e pasenshi i koperashon.

Huntu nos ta konstruí nos Rif di futuro.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: