Maria Diwan ta baha ku penshun despues di 70 aña: un herensia eksepshonal di dedikashon i lealtat
Maria Diwan ta baha ku penshun despues di 70 aña: un herensia eksepshonal di dedikashon i lealtat
Willemstad – Riba 15 di sèptèmber 2026, Maria Diwan a alkansá un momentu históriko ku masha poko ta bini dilanti den e mundu empresarial: despues di 70 aña sin interupshon konektá ku Coca-Cola i ku famia Pinedo, el a tuma despedida ofisial riba djabierne dia 18 di e bida laboral. Aki dos siman, dia 30 di sèptèmber, tin motibu pa selebrá atrobe, Maria ta selebrá su di 87 kumpleaños.
Di su promé trabou pa 70 aña di lealtat
Maria a kuminsá su karera na aña 1956, na edat di 16 aña, na N.V. Antilliaanse Chocolade Industrie Icasa, un fabrika di shon Victor Pinedo, kaminda tabata produsí diferente tipo di chukulati. Despues ora e fabrika di Coca-Cola a muda pa e mesun sitio na Emancipatie Boulevard, Maria a keda traha na e lokalidat i a keda konektá ku famia Pinedo. Komo sekretaria di direktiva, el a sostené diferente director general durante e añanan.
Lokual ku a kuminsá komo su promé trabou, a bira un karera eksepshonal di shete dékada. Maria a mira generashonnan di koleganan bini i bai, el a eksperensiá kambionan grandi den teknologia i den sosiedat, i a mira e kompania krese i kambia huntu ku Kòrsou.
Te na su último dia di trabou, Maria a keda aktivamente envolví den e organisashon. Apesar ku durante e último aña e no tabata traha ‘full-time’ mas, su presensia na ofisina tabata hopi speshal pa hopi kolega. Pa hopi hende, pasa un momentu serka Maria pa un kombersashon tabata un parti fiho di nan dia di trabou.
Fuera di su trabou diario, durante hopi aña Maria a hunga un papel importante den e aspekto sosial di e kompania tambe. E tabata organisá aktividatnan pa personal, selebrashonnan i reunionnan, i asina a kontribuí na e kultura fuerte i uní di kompania.
Un bos konosí, poeta i un kurasoleño komprometé
Bida di Maria no tabata konsistí solamente den Coca-Cola. Durante alrededor 45 aña e tabata forma parti di Z-86/Curom tambe. Despues di trabou, e tabata bai studio di radio pa grabá e programa di mainta ‘Kibra den Marduga’, ku tabata wòrdu transmití tur mainta for di mitar di seis. Generashonnan di kurasoleño tabata lanta ku su bos, ku mensahenan di kumpleaños, poemanan i informashon tokante nos isla.
Ademas, Maria a konstruí un nòmber pa su mes komo eskritora i poeta, ku trabou na Papiamentu i Hulandes. Na aña 1982 el a publiká su buki pa hubentut ‘Solo ta sali pa bo tambe’ i na aña 1989 su kolekshon di poemanan ‘Suspiro’. Na aña 2000, el a risibí e ‘Tapushi Literario’ pa su kontribushon na literatura i kultura di Papiamentu.
Tambe su kompromiso ku komunidat ta karakterisá Maria. Banda di su aktividatnan públiko, Maria tabata konosí pa su sosten silensioso na personanan i famianan ku tabata pasando den difikultatnan finansiero, sin buska rekonosementu pa esaki. Na aña 2021, su kontribushon di hopi aña na komunidat a keda rekonosé pa e Krus di Mérito.
Un konekshon bibu entre pasado i presente
Despues di 70 aña, Maria Diwan ta muchu mas ku un empleado ku un kantidat eksepshonal di añanan di servisio. Su karera tambe ta forma un parti di e historia di Kòrsou: for di un muhé hóben ku na aña 1956 a pone su promé pasonan den merkado laboral, te na un sekretaria di direktiva respetá, lokutor, poeta I un miembro komprometé di komunidat.
Ku 70 aña di servisio, mundialmente Maria ta un di e empleadonan ku mas tantu tempu aktivo den sistema di Coca-Cola. Esaki ta hasi su karera no solamente algu esktaordinario pa Kòrsou, sino tambe algu hopi spesial den e komunidat mundial di Coca-Cola.
Den Coca-Cola, el a bira un konekshon bibu entre pasado i presente. Su konosementu, su memoria i su historianan ta forma un parti balioso di e memoria kolektivo di e organisashon. Su étika di trabou, lealtat, disipliná i involukrashon personal a hasi’é un ehèmpel pa diferente generashonnan di kolega.
Ku su penshun, Maria ta sera un kapítulo úniko. Sin embargo, su herensia ta keda bibu den e personanan ku el a traha ku ne, den e kultura ku el a yuda forma i den e balornan ku el a representá durante 70 aña.
Dia 18 di sèptèmber, Coca-Cola ta tuma despedida di un kolega hopi spesial. Sin embargo, su historia ta keda parti di e historia di e kompania i tambe di Kòrsou.
Felisitashon
Personanan ku kier manda un mensahe di felisitashon pa Maria, por hasi esaki via e-mail na marketing@cocacola.cw. Coca-Cola lo pèrkurá pa e mensahe yega serka Maria.
70 aña di servisio. Un karera ekstraordinario. Un herensia ku ta permanesé pa semper.
