Kambio den forma di operá pòstnan di ambulans ta perhudiká e servisio di kuido pero tambe e forma di kambio di warda lo por tin konsekuensia pa ku transmishon di COVID-19, bou di e personal

 

 

 

 

Willemstad, 8 di sptember 2020

 

Presidente di Parlamento di Kòrsou

Señora A. Pauletta

Wilhelminaplein # 4

PRESENTE

 

Señora Pauletta,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di GMN, señora Zita Jesus-Leito.

 

Danki pa e koperashon.

 

Atentamente,

 

 

 

Gilmar Pisas

Lider di frakshon di MFK

 


 

Minister di GMN

Señora Zita Jesus-Leito
PRESENTE

Kòrsou, 8 di sèptèmber 2020

Tópiko: Kambio den forma di operá pòstnan di ambulans ta perhudiká e servisio di kuido pero tambe e forma di kambio di warda lo por tin konsekuensia pa ku transmishon di COVID-19, bou di e personal

 

Minister Jesus-Leito,

 

Empleadonan di ambulans, ta sumamente preokupá ku vershonnan ku, ku Fundashon Ambulans Kòrsou (FKA) a disidí di trese kambio den e forma ku ta operá e diferente pòstnan i tambe kambio di orario di personal ku ta laborá na FKA.

 

Segun nos informashon maneho di FKA a tuma e desishon ku tur empleado di e servisio mester mèldu na e pòst na Zaquito i nan mester sali for di Zaquito i bai okupá e pòstnan na Barber i Montaña. Komo konsekuensia di e kambio aki, na momentu di kambio di warda mas ku 16 miembro di personal ta topa otro na e pòst.

 

Si resultá ku un miembro di personal ta afektá ku e vírus di COVID-19, esaki por ser transmití di forma rápido pa e 15 otro koleganan ku ta presente pa kambia warda.

 

Otro problema ta ku si un ambulans ku ta dunando servisio no yega aden na tempu, esaki tin komo konsekuensia ku e personal ku mester baha warda i esun ku tin ku subi warda no por sali na tempu pa nan kas i ta yega nan kas hopi mas lat ku nan orario di trabou ta preskribí. Esaki tin ora ta oumentá e oranan ku e personal mester laborá ku algu mas di un ora èkstra.

 

Pa bienestar di e servisio ku personal di FAK tin ku duna na komunidat, pero tambe pa nan mes protekshon kontra di e pandemia di COVID-19, suskrito Parlamentario pa Frakshon di MFK ta aserka Minister di GMN, konforme artíkulo 96 di reglamentu di Orden, ku e siguiente preguntanan;

 

  1. Minister por informá Parlamento ku ta bèrdat ku a tuma e desishon ku kambio di warda di e empleadonan di FAK ta tuma lugá di otro forma di kual e personal tabata kustumbrá?

 

  1. Si Minister su kontesta na pregunta # 1, kua ta e motibunan ku a kondusí na tuma e desishon aki i dikon no ta tene kuenta ku reglanan ku Gobiernu mes ta informá di dje relashoná ku COVID-19?

 

  1. Kua ta e motibunan ku a oumentá e kantidat di ora ku e personal di FAK mester laborá i ku nan ta yega nan kas mas lat ku kustumber?

 

  1. Kon Minister ta garantisá kuido i bida di e ser humano na momentu ku tin un òf otro nesesidat di urgensia kaminda ta rekerí presensia di ambulans, miéntras ku esaki ta na Zaquito pa kambio di warda?

 

  1. Dikon e tipo di desishonnan aki ta wòrdu tuma di forma unilateral i no den konsulta ku representante di e barionan konserní i/òf ku informashon previo na abitantenan di e areanan aki?

 

  1. Minister ta sostené e desishon aki di FAK pa laga 16 miembro di personal ta huntu pa kambio di warda i ku lo por tin konsekuensia pa transmishon di COVID-19 bou di e personal?

 

  1. Minister ta dispuesto pa sinta na mesa ku e personal di FAK pa skucha nan inkietutnan i trese bek pas laboral na FAK?

 

Na nòmber di pueblo di Kòrsou i empleadonan di FAK suskrito ta spera ku Minister lo kontesta nos preguntanan den e tempu akordá entre Parlamento i Gobiernu, pa asina por haña bista i klaridat riba e servisio ku ambulans mester duna den e dos areanan aki di Kòrsou.

 

Atentamente,

 

Gilmar Pisas

Lider di frakshon di MFK

 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: