KÒRSOU LO ENFRENTÁ CANADA MAÑAN, 25 DI MART 2023 DEN STADION ERGILIO HATO! E DIA A YEGA!
Tur kos ta kla pa mañan anochi 9’or nos selekshon nashonal enfrentá Canada den Stadion Ergilio Hato! Awe ‘nochi nos selekshon ta tin su último seshon di training i nos hungadónan ta mentalmente i físikamente bon prepará pa nos partido di mañan.
Karchinan lo ta na benta mañan promé ku wega na e lokètnan di SDK for di 9’or di mainta te ku ora di wega. Por kumpra tambe ‘online’ via Caribbeanticketshop i na e otro puntonan di benta te ku mèrdia. Entrada pa e partido entre nos selekshon i Canada ta kosta fl.25,- general miéntras VIP ta kosta fl.175,- ku konsumo inkluí.
Pa e partido aki lo tin un ‘fan zone’ di mitar di 7 pa mitar di 9 di anochi pafó di stadion pa un i tur por disfrutá promé ku e wega. E ‘fan zone’ aki ta un área kaminda fanátikonan por partisipá na diferente wega pa gana premionan atraktivo serka nos spònsernan Tui, Uralco i Blue Bay pero tambe por kumpra bo suèter di nos selekshon nashonal òf merkansia di YDK. Por disfrutá di músika di Dj Jaystax i dal un serbes òf un refresko serka nos spònsernan, Distribier i Coca-Cola.
Un ambiente tur afó komo antesala di e tremendo partido di nos selekshon nashonal i Canada!
E siguiente hungadónan lo saka nos kara mañan durante e partido kontra Canada;
- Godfried Roemeratoe
- Juninho Bacuna
- Leandro Bacuna
- Eloy Room
- Vurnon Anita
- Elson ‘Sontje’ Hooi
- Kevin Felida
- Kenji Gorré
- Sherel Floranus
- Brandley Kuwas
- Rangelo Janga
- Richairo Zivkovic
- Roshon van Eijma
- Giovanni Troupée
- Rhu-Endly ‘Cuco’ Martina
- Trevor Doornbusch
- Xander Severina
- Juriën Gaari
- Tyrick Bodak
- Justin Ogenia
- Nathangelo Markelo
- Jeremy Antonisse
- Shanon ‘Cheese’ Carmelia
Lamentablemente nos hungadó Darryl Lachman a kai afó pa motibunan personal i lo no partisipá na e partido di mañan.
Un tabla lo bula mañan anochi ora nos selekshon nashonal enfrentá Canada den Stadon Ergilio Hato! Wak pa bo tei trempan den stadion pa bo grita, apoyá i sostené nos selekshon nashonal!
24 mart 2023
