FINAL DI OUDITORIA DI INTERNATIONAL MARITIME ORGANIZATION PA KÒRSOU
MINISTERIO KONSERNÍ TRÁFIKO, TRANSPORTE I PLANIFIKASHON URBANO
FINAL DI OUDITORIA DI INTERNATIONAL MARITIME ORGANIZATION PA KÒRSOU
PUBLIKÁ RIBA 27 MART 2023
Willemstad – Riba djabièrnè 24 di mart, International Maritime Organization (IMO) a finalisá nan ouditoria di Kòrsou pa loke ta asuntunan marítimo.
Meta di e ouditoria aki tabata pa midi i konfirmá ku Kòrsou, komo parti di Reino Hulandes i pues miembro di IMO, ta kumpli ku e mishon i tarea di IMO. Pa medio di konvenio, kódigo, i leinan marítimo, e mishon di IMO ta pa salbaguardiá nos mundu marítimo, i kuida i protehá bida humano, karga, i material.
E ouditoria aki ta tumando lugá den henter Reino Hulandes, komo miembro di IMO. Pues esaki ta inkluí Hulanda i islanan BES, Kòrsou, Aruba, i St. Maarten. Tur pais ku ta miembro di IMO lo risibí un ouditoria kada 7 aña.
Minister Cooper huntu ku e tim di Kòrsou na e okashon aki, a gradisí e ouditornan di IMO, tur e partisipantenan lokal ku a duna nan aporte na un manera profeshonal, habri, transparente i ophetivo. Tambe a gradisí e ‘Single Point of Contact’ di Reino Hulandes, i e kordinadó Nashonal di Kòrsou .
E ouditornan a hasi entrega di un rapòrt ku lokualnan a konstatá. IMO lo manda e rapòrt definitivo kual tambe lo keda publiká. Kòrsou, huntu ku otro paisnan den Reino Hulandes lo bai traha riba un asina yama ‘Corrective Action Plan’ ku lo wòrdú monitoriá pa IMO.
Lo tin un konferensha den luna di aprel durante kual tur e ministernan enkargá ku asuntunan marítimo den reino lo diskutí e resultadonan di e ouditoria aki, i trata tambe e strategia pa asina por yega na un nivel mas haltu di kumplimentu ku e tratadonan internashonal ku ta toka e konservashon nos lamannan, e sistema ekológiko ku ta forma parti di esaki, i seguridat marítimo.
