JCI IOBA Curaçao den kolaborashon ku U.O. Reclassering Curaçao a inisiá un proyekto nobo.

UO Reclassering Curacao

JCI IOBA Curaçao den kolaborashon ku U.O. Reclassering Curaçao a inisiá un proyekto nobo. Nòmber di e proyekto aki ta Curaçao Safe! Meta di e proyekto ta pa krea konsientisashon tokante e benefisionan pa tuma klientenan di U.O. Reclassering na trabou.
Pa medio di entre otro un foro, dunadónan di trabou lo haña e oportunidat pa trese nan puntonan di atenshon dilanti, pa loke ta trata e grupo di enfoke. Resultado di esaki lo ta pa yega na un “database” di 30 – 40 dunadó di trabou ku ta bon informá, ekipá i dispuesto pa tuma klientenan di Reclassering den servisio.
Na nòmber di U.O. Reclassering sra. Elienalda Wilson lo ta e persona enkargá ku e proyekto di Curaçao Safe huntu ku sra. Carlnedra Manuel i sra. Sharité Louisa di JCI IOBA Curaçao. E proyekto aki ta di gran balor pa un otro proyekto ku pronto U.O. Reclassering lo inisiá, kual ta e proyekto “Na kaminda pa mi trabou”; e proyekto a keda akordá resientemente dor di Minister di Hustisia sr. Shalten Hato. Realisashon di e proyekto Curaçao Safe lo hasi e kaminda pa trabou di e klientenan di U.O. Reclassering mas fasil i lo kontribuí na un Kòrsou mas sigur.
Danki na e miembronan di JCI IOBA ku di un forma boluntario ta karga e proyekto aki.
Curaçao Safe Powered by JCI IOBA Curaçao