DRENTANDO TEMPORADA DI CAMPAMENTO BAN CORDA PA CUIDA NOS PLAYA NAN Y NATURALESA
Prome Minister Evelyn Wever – Croes:
DRENTANDO TEMPORADA DI CAMPAMENTO BAN CORDA PA CUIDA NOS PLAYA NAN Y NATURALESA
ORANJESTAD – Dentro di poco nos ta drenta e temporada conoci na Aruba di campamento. Den cuadro di esaki, Prome Minister Evelyn Wever – Croes kier recorda comunidad riba e importancia di nos beachnan. Ban cuida nos naturalesa pa nos por gosa di dje pa hopi aña mas.
Poco tempo pasa Eagle Beach Aruba a gana un reconocemento di Tripadvisor, como e playa number 1 den Caribe y number 2 na mundo. Eagle Beach ta un playa sumamente importante pa Aruba su turismo, e ta bunita, e ta amplio y e ta un sitio cu tur hende por bay relaha. E reconocemento di Eagle Beach ta algo cu a logra hunto como comunidad, y pues e ta hopi importante pa hunto sigui mantene, y percura cu e ta keda e bunita beach manera cu e ta, Prome Minister Wever – Croes a expresa.
“E reconocemento aki no a bin di su mes, el a bin como resultado di un vision cu gobierno tin di basta tempo caminda cu ta inverti den e playanan. Pesey algun aña pasa a bin cu un proyecto pa drecha y mantene e beachnan y patrimonionan historico y nacional. Prome cu Eagle Beach, a traha riba proyecto Arashi y Boca Catalina, caminda cu a yena santo nobo unda cu tabata mester y a hacie mas amplio pa tur hende por gosa di dje.”
Aworaki drentando temporada di campamento, ta haci apelacion na un y tur pa gosa di naturalesa y nos playanan pero ban cuide tambe. A drecha e beachnan pa tur hende haci uzo di dje, awo ban percura pa cuide pa asina tin hopi aña mas di goso y probecho di dje, Prome Minister a termina bisando.
