FFK I DISTRIBIER KÒRSOU A SERA UN AKUERDO TE KU AÑA 2026!

Den e siman tras di lomba FFK i Distribier Kòrsou a sera un akuerdo pa un kolaborashon pa 4 aña. E kombenio aki ta enserá ku FFK lo tin un partner mas, ku lo sòru pa produktonan di Distribier Kòrsou na un preis redusí i tambe grátis pa por rebendé na e fanátikonan ku bishitá Stadion Rignaal ‘Jean’ Francisca i nos partidonan. Esaki ku e meta pa FFK por invertí mas den su ekiponan lokal i nos selekshonnan nashonal. Tambe nan lo duna un man ku e parti promoshon riba nan plataformanan mirando ku awor nan tambe ta miembro di e famia grandi di futbòl. Ámbos partido a firma e akuerdo aki na FFK pa despues bai riba e tereno na Stadion Rignaal ‘Jean’ Francisca kaminda a inmortalisá e momentu aki, ku ta representá e komienso di un bunita relashon entre Distribier Kòrsou i FFK.

 

Sr. Sigurd de Wind di Distirbier Kòrsou ta hopi kontentu i orguyoso di ta partner ku FFK i mas ku klaro forma parti di e desaroyo i kresementu di futbòl na Kòrsou. Distribier Kòrsou ta un kompania ku ta kere den hóbennan i opta pa duna nan granito na nos hubentut ku ta praktiká e deporte rei, futbòl.

 

FFK ta konta ku un miembro mas den e famia di futbòl ku mira riba e progreso, desaroyo i promoshon di nos selekshonnan i mas ku klaro futbòl en general aki na Kòrsou.

 

30 mart 2023