MINISTER DI FINANSA TA STIMULÁ FWNK I ABVO PA FINALISÁ TRAYEKTO DI CAO

MINISTER DI FINANSA TA STIMULÁ FWNK I ABVO PA FINALISÁ TRAYEKTO DI CAO

Minister di Finansa ta hasi un súplika urgente na Fundashon Wega di Number Kòrsou (“FWNK”) i ABVO pa firma CAO pa mas tardá 31 di mei 2023. Esaki Minister di Finansa a informá ambos partido pa medio di un karta. FWNK i ABVO ta den negosashonnan di CAO pa e trahadónan di FWNK ya pa hopi aña kaba, i te ku dia di awe no a logra yega na un akuerdo.

Durante di un reunion ku a tuma lugá 5 di sèptèmber 2022, kaminda representantenan di tantu FWNK i ABVO tabata presente, e partidonan a duna di konosé ku e CAO lo a wòrdu finalisá pa mas tardá 31 di desèmber 2022. Lamentablemente, Minister di Finansa mester konstatá ku e trayekto aki no a finalisá i ku e CAO no ta firma ainda. Ounke Minister di Finansa no ta outorisá pa duna instrukshon na maneho di FWNK i na ABVO, Minister di Finansa ta hasi un yamada urgente tantu na FWNK i ABVO pa hasi nan máksimo esfuerso pa yega na un akuerdo pa fin di e luna aki, di manera ku e trahadónan di FWNK por kuminsá disfrutá di kondishonnan di trabou mas faborabel.

Konsiderando e hecho ku e CAO mester wòrdu firmá pa hunta di komisarionan di FWNK (“RvC”) tambe, Minister di Finansa a rekordá RvC riba nan tarea komo supervisor, pa tuma desishonnan kaminda ta nesesario pa por finalisá e trayekto di CAO.

Minister di Finansa ta spera ku tur partido embolbí lo pone prioridat pa finalisá e trayekto di CAO, ku ta na benefisio di tur e trahadónan di FWNK.