PROME MINISTER TA DUNA UPDATE DI E DESAROYONAN Y RECUPERACION DI ARUBA NA PREMIER RUTTE

Prome Minister Evelyn Wever-Croes:

 

Den reunion cu Premier Rutte na Hulanda,

PROME MINISTER TA DUNA UPDATE DI E DESAROYONAN Y RECUPERACION DI ARUBA NA PREMIER RUTTE

Durante e conferencia di prensa cu a tuma luga na Aeropuerto Reina Beatrix diahuebs ultimo na yegada di Prome Minister Evelyn Wever-Croes for di Hulanda, e mandatario principal di nos pais a elabora riba algun reunion importante cu a tuma luga na Hulanda. Prome Minister entre otro a enfoca riba su reunion cu Premier Mark Rutte.

 

Den e reunion cu Premier Rutte, diferente tema a wordo trata na unda tambe Prome Minister a duna Premier Rutte un update di e desaroyonan na Aruba y su e recuperacion. Premier Rutte a keda hopi impresiona di mira            con fuerte y con lihe Aruba ta desaroyando y recuperando di e pandemia.

 

Entre otro a toca e tema di e Onderlinge Regeling, di refinanciamento di e debe di Covid cu Aruba tin cu Hulanda, y e condicion cu Hulanda ta poniendo ainda riba mesa pa pone un Rijkswet Aruba Financieel Toezicht, RAFT.

 

“E reunion aki tambe a bay hopi bon. Mi ta mirando portanan ta habriendo cu ta yuda nos pa yega na solucionnan mas lihe”, Prome Minister a enfatisa.