Resientemente a sali den publisidat ku for di Parlamento a hasi un denunsia relashoná ku posibel akto penal.
Ta responsabilidat di Parlamento, komo instituto i órgano mas haltu den nos komunidat, pa informá públiko, spesialmente mirando e konsternashon ku esaki por trese den komunidat.
Di otro banda no ta e intenshon pa tacha nòmber ni reputashon di ningun persona òf instansia.
Den Parlamento tin aktualmente seis (6) frakshon i kada frakshon por opta pa laga un máksimo di dos (2) kolaborador asistí nan den nan trabounan parlamentario. Ora un frakshon kier tuma un kolaborador den servisio esaki ta kana e siguiente proseso.
Na promé lugá e lider di frakshon ta hasi un petishon por eskrito. Huntu ku e petishon aki tambe ta manda informashon tokante e kandidato pa e puesto di kolaborador. E informashon aki ta enserá en todo kaso un kuríkulo (CV) di e persona konserní i tambe informashon tokante su entrada òf salario. E departamento di Rekurso Humano di Parlamento huntu ku Grefir ta evaluá e informashon aki. A base di esaki ta emití un konseho pa e Komishon di Asuntunan Doméstiko, kual ta e komishon outorisá pa tuma desishonnan enkuanto personal i tambe kolaboradornan den Parlamento.
Resientemente frakshon di Trabou pa Kòrsou (TPK) a hasi petishon pa tuma kolaborador(nan) den servisio i a entregá dokumentonan konforme prosedura. Evaluashon di e dokumentonan aki a lanta diferente pregunta bálido, entre otro tokante outentisidat di e informashon ku a keda entregá.
Parlamento mes no tin ningun instrumento pa por verifiká e informashon, pero mirando ku echonan i sirkunstansianan ta duna sufisiente motibu pa por tin duda enkuanto e informashon ku a ser suministrá, Komishon di Asuntunan Doméstiko a opta pa laga hasi un investigashon mas a fondo.
Den e kuadro aki e komishon a duna mandato na su presidente, ku ta alabes Presidente di Parlamento, pa por hasi un denunsia na Ministerio Públiko a traves di Landsrecherche pa posibel echonan kastigabel den proseso pa yega na un òf mas kolaborador pa e frakshon di TPK.
Hasiendo esaki Parlamento mes lo no tin ningun influensia riba e manera ku lo hiba e investigashon ni tampoko su resultado i ta evitá kualkier posibel konflikto di interes. Ta keda na e outoridatnan konserní di Ministerio Públiko pa determiná kon lo enkaminá un investigashon den e kaso spesífiko aki. Miéntras e investigashon aki ta tuma lugá lo no ta apropiá pa duna ningun informashon mas, di parti di Parlamento, riba esaki. Nos ta konfia ku e outoridatnan lo por hasi nan trabou sin estorbo i den kuadro di regla i lei.
Ku esaki Parlamento ta spera di a informá públiko general debidamente tokante e situashon ku a presentá.
Presidente di Parlamento
Sra. Charetti America-Francisca.
