Situashon relashoná ku asuntunan di personal di Duana

Sindikatonan ABVO i STRAF, Duana i Ministerio di Finansa tabatin un reunion fruktífero djaluna 17 di aprel pa papia tokante di e situashon relashoná ku e kondishonnan di trabou i otro asuntunan di personal di e trahadónan di Duana.

Durante di e reunion a atendé diferente punto di agènda, entre otro, partisipashonnan tokante di e dekreto di pais di Duana Kòrsou (P.B. 2010 no. 69), intensifikashon di tarea i implementashon di e plannan di reforma.

E asuntunan pendiente relashoná ku personal ta wòrdu atendé dor di un grupo di trabou. A traha prosesonan i palabrashonnan di trabou konkreto pa atendé e asuntunan di personal pendiente na un forma manehabel. E prosesonan i palabrashonnan di trabou aki lo wòrdu elaborá i presentá den un plan di akshon i un ‘dashboard’ di mónitòr progreso denter di dos siman.

A base di e plan di akshon i bon akuerdo ku sindikatonan ABVO i STRAF, lo modernisá e dekreto di Duana (P.B. 2010 no 69) i lo buska solushonnan pa e puntonan di atenshon manera pikèt i e kompensashon di remplaso temporal.

Entretantu a logra bon adelanto pa un kantidat di e asuntunan relashoná ku personal:

● Lo promové 24 persona di eskala 6 pa eskala 7; Esakinanan a wòrdu presentá na Minister djabièrnè 14 di aprel último;

● 11 kaso pa promoshon di eskala 5 pa eskala 6 ta den proseso i ta serka gobernador;

● Gratifikashon di hubileo di 44 persona ta den proseso i ta serka gobernador;

● E grupo di trabou “Koningsplein” a evaluá diferente opshon di mudansa i lo tuma un desishon respekto esaki denter di dos luna.

E sindikatonan lo reuní kada 6 siman ku maneho di Duana pa trata e progreso i situashon di e asuntunan, a base di e plan di akshon i e ‘dashboard’ pa mónitòr progreso.

Ademas, lo plania reunionnan riba base regular entre e grupo di trabou i e sindikatonan, pa nan por ta embolbí i informá na un forma direkto. Otro asuntunan relashoná ku personal tambe por wòrdu tratá den e reunionnan aki.

E meta prinsipal di e plan di akshon di e grupo di trabou ta pa informá e personal di Duana na un forma kla tokante di e situashon i e planifikashon di e asuntunan di personal pendiente.

Tur e partidonan ta determiná pa yega na un bon kolaborashon i pa traha huntu na un ambiente di trabou salú pa e trahadónan di Duana. E siguiente reunion entre e partidonan lo tuma lugá fin di mei, kaminda lo trata e plan di akshon pa e próksimo 6 lunanan ampliamente.

Pa mas informashon por tuma kontakto ku e kolaboradornan di prensa di e partidonan embolbí.

Final di komunikado di prensa.