MINISTER HATO A PIDI HULANDA YUDANSA PA TRAHA UN PRIZÒN NOBO

Minister di Hustisia mr. Shalten Hato ta konsiente dje situashon den kual dos di e institutonan ku ta kai den e kadena hudisial ta aktualmente. Esei ta e motibu ku Minister Hato ta asumí su responsabilidat pa garantisá i respetá derechi di tur persona i a aserká Minister pa Protekshon di Derecho, señor Franc Weerwind ku e petishon pa Hulanda duna su aporte den konstrukshon di un prizòn nobo òf aportá pa mehorá e infrastruktura dje institutonan.

Kòrsou ta disponé di dos (2) instituto penitensiario. Ta trata primeramente di SDKK den kual un persona mayor di edat ta sinta su kastigu di prizòn. Banda di esaki Kòrsou konosé e instituto JJIC ku tin e tarea pa ehekutá desishon di wes enkuanto menornan di edat, basá riba tantu lei sivil komo tambe lei penal.

Minister Hato a splika den su karta ku e situashon di SDKK ta unu preokupante i ku mester di atenshon mas pronto ku ta posibel. Reino Ulandes, meskos ku tur otro estado, mester respetá derecho di tur persona i derechonan di un detenido no ta un eksepshon. Den su karta Minister Hato a para ketu na diferente rapòrt di e “Committee for the Prevention of Torture” (CPT) den kual ta hasi menshon dje problemanan ku SDKK pa años a bin ta konfrontá.

Den pasado a hasi diferente invershon di renobashon i tambe kambio na e infrakstrutura di SDKK. E edifisio bieu a keda pará, i a invertí den infrastruktura dor di amplia for di e edifisio bieu. Pero a keda konfrontá mesun problemanan atraves di aña, ku konsekuensia ku no por sigui invertí den e infrastruktura aktual.

Según minister Hato e situashon aktual ta unu preokupante. P’esei mas pronto posibel mester invertí pa asina Reino Ulandes por keda kumpli ku derechonan di kada detenido. Ta nos deber pa komo país, nos kumpli ku derechinan humano. Minister Hato a indiká ku mester invertí den un edifisio nobo pa asina salbaguardiá derechinan humano. Den e demanda ku señor Corallo a entregá na korte Oropeo, ya a hala atenshon di Reino Ulandes riba e situashon na Sint Maarten. E infrastruktura di SDKK na opinion di minister Hato den su karta, ya no ta kumpli ku e eksigenshanan internashonal kual un instituto penitensiario mester kumpli kuné.

E sentronan penitensiairio ta den mal estado i pa e motibu aki, Minister Hato den su karta ta splika ku e situashon mester ser remediá. Minister Hato a enfatisá ku a yega e momentu pa bin ku un prizòn nobo, modèrno ku ta disponé di tur teknologia avansá, di manera ku por kumpli ku derechi dje klientenan den e instituto. Un instituto nobo alabes lo kontribuí pa alsa e produktividat dje empleadonan ku ta laborá den un ambiente mas agradabel.