Tur Bòksdó Ya Ta Na Kòrsou…

Tur kos ta kanando bon pa kartelera di djasabra den Sambil Arena:

Tur Bòksdó Ya Ta Na Kòrsou…

…Rin Ta Armá…

WILLEMSTAD- Tur e bòksdónan ku mester intervení den e kartelera boksistiko di djasabra atardi 6’or pa 10’or den Sambil Arena ta na Kòrsou. E bòksdónan di Panama, Brazil i Repúblika Dominikana a yega i tur bòksdó tei pa e pesahe ku tin di tuma lugá awe djabièrnè. Ayera tardi a arma e rin pa e kartelera. Supreme Boxing Center i Curabox ta invitá tur amante di bòkseo pa ta presente. Tambe ehekutivonan di bòkseo a yega for di estranheria pa yuda guia e proseso pa e kombatenan profeshonal.

                                                 …E Programa…

E kombate prinsipal lo bai entre Keiber Gonzalez i Jose Avilis den 160 liber. Lo ta un kombate di 8 asalto. E venezolano Keiber Gonzalez ta invikto den 18 pelea, di kual e la gana 16 di nan pa via rápido. Tambe Pedro Sanchez di Venezuela lo bringa Felix Gutierrez di Repúblika Dominikana. Un kombate ku sin duda lo atraé hopi fanátiko ta e pelea mucha muhé entre Flavia Figueiredo di Brazil i Atheyna Bylon di Panamá. Ta di tres biaha ku nan dos ta topa ku otro, ku kada un ku un triunfo. Ámbos bòksdó tin aspirashon pa gana medaya den Olimpiada di Paris. Bin apoyá nos bòksdónan lokal amatùr manera: Dwinley Mathilda, Nahdir Haseth, yu di Renato Haseth, Shermilon Susana, Christine Francisca i Fabien Anthoine ku lo bringa Shaquan Croes di Aruba.