Prome Minister Evelyn Wever-Croes:   MENSEHE DI PROME MINISTER RIBA DIA INTERNACIONAL DI HENDE MUHE “Ban stimula nos muchanan muhe pa nan desaroya na nan potencial pa crea un miho mundo”

 

Prome Minister Evelyn Wever-Croes:

 

MENSEHE DI PROME MINISTER RIBA DIA INTERNACIONAL DI HENDE MUHE

“Ban stimula nos muchanan muhe pa nan desaroya na nan potencial pa crea un miho mundo”

 

Prome Minister Evelyn Wever-Croes, riba Dia Internacional di Hende Muhe, ta felicita tur ciudadano femenino cu ta biba riba nos dushi baranca. Hende muhe cu ta traha duro, balente y cu curashi. Cu ta lanta tur dia pa hiba nan famia y nos pais padilanti. Den su palabranan di felicitacion pa tur ciudadano femenino di nos pais, Prome Minister a duna palabra di gradicimento tambe na tur hende homber cu ta brinda e hendenan muhe den nan bida, sea ta casa, famia, bisiña of colega di trabou, e oportunidad pa haci loke e hende muhe gusta haci pa progresa y bay padilanti.

 

Prome Minister: “Riba e dia di awe ta importante pa nos para keto na e papel di hende muhe y con e hende muhe a desaroya den hopi area aki na Aruba. Hopi hende muhe den nos comunidad a representa tur otro ciudadano femenino dignamente. Pero tin mas caminda cu nos por ta presente.

 

Pakico mi ta kere ta importante pa hende muhe ta presente den tur area den nos comunidad? Pasobra si nos kier pa nos gobernantenan y tur instituto tene cuenta cu necesidad, derecho y preocupacionnan di hende muhe, nos mester ta eynan, bon representa pa nos por influencia e decisionnan cu mester wordo tuma.

 

Aworakinan, ami ta e prome Prome Minister femenino di Aruba, pero mi no kier ta e ultimo. Mi kier pa nos tin bon representacion di hende muhe, mas representacion den gobierno y den parlamento y p’esey mi mester di cada un di bosonan, dama y cabayeronan.

 

Ban stimula nos muchanan muhe. Ban yuda nan pa nan tambe por desaroya na nan potencial completo pasobra pa e mundo aki ta un miho mundo, nos mester un balanse entre e hende muhe y e hende homber.

 

Nos ta papia hopi biaha cu nos kier laga un miho planeta pa nos yiunan. Awor mi ta haci un apelacion riba un y tur, ban laga miho yiunan pa e planeta aki. Ban laga hende muhe fuerte y resiliente, bon prepara pa e planeta aki.

 

Riba e dia aki un biaha mas, masha masha pabien. Danki pa e sosten y apoyo cu ami como persona ta ricibi pa por guia nos dushi Aruba”.

 

 

 

This site uses Akismet to reduce spam. Learn how your comment data is processed.

%d bloggers like this: