DIA DI SAKRIFIDIO PATRIMONIAL: 4 MEI 2023

4 Di mei ta konmemorá Víktimanan di Segundo Guera Mundial

Willemstad – Djaweps 4 di mei durante un seremonia sòlèm na monumento di guera “Monument der Gevallenen” na Waaigat, ta konmemorá esnan ku a pèrdè nan bida den Segundo Guera Mundial.  Alabes riba e fecha aki ta duna rèspèt na, i rekordá tur militar i sivil ku durante temporada di guera, mishonnan di pas di organisashonnan internashonal òf na man di teroristanan, a bin pèrdè nan bida. Gobièrnu di Kòrsou, Marina Real, VKC,  Scouting Antiano, Brigada di Seguridat, SMEC, KPC, Veteranonan, komunidat Hudiu i Famianan di esnan ku a pèrdè nan bida durante Segundo Guera Mundial kada aña ta bini huntu pa konmemorá e echo aki.

Esaki ta tuma lugá durante un seremonia sòlèm na e “Monumento di Guera”  na Waaigat i na Santana Militar na Roodeweg. E seremonia na Waaigat ta kuminsá 9:00’or di mainta i ta habrí pa públiko. Durante e seremonia tin posibilidat pa famia i esnan ku ta deseá esaki pone flor. Na Santana Militar na Roodeweg, e seremonia ta kuminsá 10:30’or.

E akto di 4 di mei pa konmemorá e víktimanan di guera ta unu di sumo importansia, pa motibu ku den lus di sustu i tristesa kousá pa Segundo Guera Mundial komunidat internashonal a disidí ku ningun hende, hamas, mester falta ‘E Derecho di tin Derecho’. Pa duna forma moral i forsa legal na esaki, a buta balor humano den palabra i ankrá esaki den e derechonan fundamental di hende.