PIN ke sa si tei sende lus na kas tambe
Ku euforia a risibí barku di fruta, pero ki esfuerso ta hasiendo pe agrikultor lokal?
Willemstad — Ku euforia promé minister Pisas i su koleganan a risibí e dos promé barkunan di fruta benesolano. Klaro ku esaki ta nifiká mas bida den Punda i ta lanta e atrakshon turístiko di nobo. Pero mas ku tur kos esaki ta nifiká un gran alivio pa Venesuela ku ta hustamente esun ku a sera frontera di un forma traishonero. Den lus di esaki Partido PIN ta puntra: gabinete Pisas por sigurá komunidat ku e ta sostené e agrikultor lokal ku e mes un entusiasmo ku e la traha pa trese e barkunan benesolano bek?
Konteksto
Partido PIN ta kontentu ku, maske ta gobièrnu benesolano a sera frontera sin ningun provokashon, partnernan den reino a sigui traha pa normalisá e relashonnan. Tambe PIN ta aploudí e echo ku banda di un atrakshon turístiko, e barkunan ta ofresé un alternativa pa fruta i bèrdura na bon preis.
Sinembargo ta bon pa realisá ku loke e barku benesolano ta ofresé na bon preis a keda produsí pa labor super barata, ku fertilisante i vitamina subsidiá, i ta keda transportá ku trùk i barku ku ta kore riba diesel i gasolin praktikamente pòrnada. PIN ta puntra: ta hustu pidi e agrikultor lokal pa kompetí kontra esaki?
Ademas ta bon pa Kòrsou kòrda ku kada importashon ta un peliger pa nos reserva di divisa. Den kaso di agrikultura hopi biaha e ta un peliger innesesario paso nos por produsí hopi mas ku nos propio tera i asina krea trabou lokal, tur esei miéntras ta spar divisa tambe.
Tili si, tala no?
PIN ta pro un ekonomia habri. Pero PIN ta pro balansa tambe. Ora PIN tabata karga responsabilidat pa agrikultura nos a dòbel nos produkshon lokal, tabata fasilitá agrikultornan ku fiansa hopi suave via dje Fondo di Agrario, a tene vários kurso grátis pa agrikultura moderno, a konsientisá komunidat via dje programa Kunukito i mas importante ainda a bai laga un dekreto ministerial atras pa fasilitá agrikultornan ku awa barata di Aqualectra mes. Te ainda e ministernan aktual no a firma e dokumento ei.
Pregunta
Esakinan ta trese PIN na e pregunta: Gobièrnu Pisas por mustra kiko signifikante e la òf ta bai hasi pa sostené e agrikultor lokal meskos ku e la move shelu i tera pa e barkunan benesolano?
Maske kon bon bini e barkunan benesolano ta, nan regreso hamas mag nifiká ku atrobe tei laga e produktor lokal pa su kuenta. E gremio i nan famianan meresé un siguransa di sr. Pisas, komo esun enkargá ku agrikultura den e ministerio GMN, ku por lo ménos e lo atendé ku e dekreto pa awa barata, amplia e fondo agrario i pone tereno disponibel manera tabata e intenshon.

